រដ្ឋាភិបាលហូឡង់ កោះហៅឯកអគ្គរដ្ឋទូតអ៊ីស្រាអែល ជុំវិញការដកហូត ឋានៈអ្នកការទូតរបស់ខ្លួន
ឡាអេ៖ រដ្ឋមន្ត្រីការបរទេសហូឡង់ លោក Tom Berendsen បានកោះហៅឯកអគ្គរដ្ឋទូតអ៊ីស្រាអែលប្រចាំនៅហូឡង់ ពាក់ព័ន្ធនឹងការសម្រេចចិត្តរបស់អ៊ីស្រាអែលក្នុងការដកហូតឋានៈអ្នកការទូតរបស់មន្ត្រីការទូតហូឡង់ដែលប្រចាំការនៅទីក្រុងរ៉ាម៉ាឡា នេះបើយោងតាមការរាយការណ៍របស់ប្រព័ន្ធផ្សព្វផ្សាយហូឡង់។
យោងតាមស្ថាប័នផ្សព្វផ្សាយសាធារណៈរបស់ហូឡង់ NOS លោក Berendsen បានកោះហៅឯកអគ្គរដ្ឋទូតរូបនេះ ដើម្បីសុំការបំភ្លឺអំពីការ សម្រេចចិត្តខាងលើ ដែលប៉ះពាល់ដល់បុគ្គលិកមួយចំនួន នៃបេសកកម្មហូឡង់ ប្រចាំនៅទីក្រុងរ៉ាម៉ាឡា។
រដ្ឋមន្ត្រីការបរទេសអ៊ីស្រាអែល លោក Gideon Sa’ar បានឧ្យដឹងកាលពីថ្ងៃអាទិត្យថា អ៊ីស្រាអែល នឹងដកហូតឯកសិទ្ធិ និងអភ័យឯកសិទ្ធិការទូតរបស់មន្ត្រីការទូតហូឡង់ ដែលប្រចាំការនៅទីក្រុងរ៉ាម៉ាឡា ដើម្បីឆ្លើយតបទៅនឹងការហាមឃាត់ របស់ហូឡង់លើផលិតផលដែលមកពីតំបន់តាំងទីលំនៅ របស់អ៊ីស្រាអែលនៅក្នុងទឹកដីប៉ាឡេស្ទីន ដែលត្រូវបានកាន់កាប់។
លោកបានលើកឡើងនៅលើបណ្តាញសង្គម X ថា មន្ត្រីការទូត ទាំងនោះមានរយៈពេល ៧ ថ្ងៃ ដើម្បីប្រគល់ឯកសារការទូត ដែលចេញដោយអ៊ីស្រាអែលមកវិញ៕
ប្រែសម្រួល ឈូក បូរ៉ា
