ម៉ិកស៊ិក អះអាងថា អធិបតេយ្យភាព និងកិច្ចសហប្រតិបត្តិការ ដោយមិនស្ថិតក្រោម ឥទ្ធិពលត្រួតត្រា គឺជាគោលការណ៍ ដែលមិនអាចចរចាផ្លាស់ប្តូរបាន ក្នុងទំនាក់ទំនងជាមួយអាមេរិក
ម៉ិកស៊ិក៖ ប្រធានាធិបតីម៉ិកស៊ិក លោកស្រី Claudia Sheinbaum បានឧ្យដឹងថា ការគោរពអធិបតេយ្យភាព និងកិច្ចសហប្រតិបត្តិការដែលមិនស្ថិតនៅក្រោមការត្រួតត្រារបស់ភាគីម្ខាងទៀត គឺជាគោលការណ៍គ្រឹះដែល “មិនអាចចរចាផ្លាស់ប្តូរបាន” នៅក្នុងទំនាក់ទំនងរបស់ម៉ិកស៊ិក ជាមួយសហរដ្ឋអាមេរិក ដោយមិនគិតថា អ្នកណាជាអ្នកដឹកនាំនៅទីក្រុងវ៉ាស៊ីនតោននោះទេ។
លោកស្រី Sheinbaum បានថ្លែងនៅក្នុងសន្និសីទសារព័ត៌មានមួយនៅឯវិមានជាតិ ថា មិនមានសញ្ញាណណាមួយដែលបង្ហាញពីការផ្លាស់ប្តូរនៅក្នុងទំនាក់ទំនងជាមួយទីក្រុងវ៉ាស៊ីនតោននោះទេ ហើយកិច្ចព្រមព្រៀងសហប្រតិបត្តិការដែលមានស្រាប់រវាងរដ្ឋាភិបាលទាំងពីរ នៅតែបន្តមានសុពលភាព។
លោកស្រីបានបញ្ជាក់ថា ប្រធានាធិបតីសហរដ្ឋអាមេរិក លោក ដូណាល់ ត្រាំ និងថ្នាក់ដឹកនាំស្ថាប័នរដ្ឋាភិបាលអាមេរិក រួមទាំងបញ្ជាការដ្ឋានភាគខាងជើង ផងដែរនោះ សុទ្ធតែបានយល់ច្បាស់អំពីជំហររបស់ម៉ិកស៊ិក ពាក់ព័ន្ធនឹងអធិបតេយ្យភាព បូរណភាពទឹកដី ការជឿទុកចិត្តគ្នាទៅវិញទៅមក និងកិច្ចសហប្រតិបត្តិការផ្នែកសន្តិសុខ។
លោកស្រីបានលើកឡើងថា៖ “គ្រប់ភាគីសុទ្ធតែយល់ច្បាស់អំពីចំណុចនេះ។ យើងនឹងមិនចុះចាញ់ឡើយ ព្រោះនេះ គឺជាបញ្ហាគោលការណ៍”។
នៅពេលត្រូវបានសួរអំពីការប្រើប្រាស់ពាក្យ “អំពើភេរវកម្មគ្រឿងញៀន” ដោយរដ្ឋាភិបាលសហរដ្ឋអាមេរិក ដើម្បីសំដៅទៅលើក្រុមឧក្រិដ្ឋកម្មនានា លោកស្រី Sheinbaum បានឆ្លើយតបថា៖ “យើងមិនយល់ស្របនឹងការដាក់ស្លាកថាជាអំពើភេរវកម្មនោះទេ ព្រោះបើតាមទស្សនៈរបស់ម៉ិកស៊ិក និយមន័យនៃអំពើភេរវកម្ម គឺខុសប្លែកពីនេះ”៕
ប្រែសម្រួល ឈូក បូរ៉ា
