បរទេស៖ អ្នកនាំពាក្យលោកស្រី Narumon Pinyosinwat បាននិយាយកាលពីម្សិលមិញថា ប្រទេសថៃនិងឥណ្ឌាបានបញ្ជាក់ជាថ្មីពីការប្តេជ្ញាចិត្ត ក្នុងការពង្រឹងទំនាក់ទំនងដើម្បីប្រយុទ្ធ ប្រឆាំងនឹងវីរុសឆ្លង និងផលប៉ះពាល់សេដ្ឋកិច្ច។
យោងតាមសារព័ត៌មានថៃ បាងកក ប៉ុស្តិ៍ ចេញផ្សាយនៅថ្ងៃទី២ ខែឧសភា ឆ្នាំ២០២០ បានឱ្យដឹងថា ថ្លែងនៅវិមានរដ្ឋាភិបាលកាលពីម្សិលមិញលោកស្រី Narumon Pinyosinwat និយាយថា លោកប្រាយុទ្ធ ចាន់អូចា នាយករដ្ឋមន្រ្តីថៃ បានពិភាក្សាគ្នាតាមទូរស័ព្ទជាមួយសមភាគីឥណ្ឌាលោកនាយករដ្ឋមន្រ្តី ណារ៉េនដ្រា ម៉ូឌី អំពីកិច្ចសហប្រតិបត្តិការទ្វេភាគី ដើម្បីទប់ទល់នឹងរោគរាតត្បាត។
ឧត្តមសេនីយ៍ប្រាយុទ្ធ បានប្រាប់លោកមូឌីថា ប្រទេសថៃបានចាត់វិធានការយ៉ាងតឹងរឹង ហើយវិស័យនានាបានធ្វើការរួមគ្នា ដើម្បីគ្រប់គ្រងការផ្ទុះឡើងនៃជំងឺនេះ។
លោកស្រី Narumon បាននិយាយថា ទោះបីរដ្ឋាភិបាលកំពុងរក្សាវិធានការទាំងនេះជាច្រើនក៏ដោយ ក៏វានឹងបន្តថែរក្សាជនបរទេសនៅក្នុងប្រទេសថៃផងដែរ៕
ប្រែសម្រួលៈ ណៃ តុលា
