ព័ត៌មានអន្តរជាតិ

លោក ចូ បៃដិន៖ នឹងពង្រឹងអំណាចការទូត ដើម្បីកាត់បន្ថយការគំរាមកំហែង ពីកូរ៉េខាងជើង

វ៉ាស៊ីនតោន៖ ប្រធានាធិបតីអាមេរិក លោក ចូ បៃដិន បានឲ្យដឹង នៅក្នុងសេចក្តីណែនាំ យុទ្ធសាស្ត្រសន្តិសុខជាតិ បណ្តោះអាសន្នរបស់លោកថា សហរដ្ឋអាមេរិក នឹងពង្រឹងអំណាចការទូតរបស់ខ្លួន ដើម្បីកាត់បន្ថយការគំរាមកំហែង ដែលបង្កឡើង ដោយប្រទេសកូរ៉េខាងជើង។

ប្រធានាធិបតីអាមេរិករូបនេះ បានឲ្យដឹងនៅក្នុងគោលការណ៍ ណែនាំរបស់លោកថា “យើងនឹងផ្តល់អំណាច ដល់អ្នកការទូតរបស់យើង ឱ្យធ្វើការដើម្បីកាត់បន្ថយការគំរាមកំហែង ដែលបង្កឡើង ដោយកម្មវិធីនុយក្លេអ៊ែរ និងមីស៊ីលរបស់កូរ៉េខាងជើង ដែលកំពុងឈរទល់មុខគ្នា ជាមួយសាធារណរដ្ឋកូរ៉េ និងជប៉ុន” ។

យោងតាមការចុះផ្សាយ របស់ទីភ្នាក់ងារសារព័ត៌មានយុនហាប់ បានឲ្យដឹងថា គោលការណ៍ណែនាំនេះ បានបញ្ជាក់ពីការសន្យាមុនរបស់លោក ក្នុងការដាក់ការទូត ជាចំណុចសំខាន់នៃអ្វីៗ ដែលប្រទេសរបស់លោកធ្វើ ដើម្បីដោះស្រាយជាមួយកូរ៉េខាងជើង។

ផ្ទាំងពាណិជ្ជកម្ម

ការណែនាំបណ្តោះអាសន្ន ក៏បានកើតឡើងភ្លាមៗ បន្ទាប់ពីរដ្ឋមន្រ្តីការបរទេស លោក Antony Blinken បានដាក់ចេញ នូវអាទិភាពគោលនយោបាយ ការបរទេសកំពូលៗ ចំនួន ៨ សម្រាប់សហរដ្ឋអាមេរិក។

ក្នុងនោះបានរាប់បញ្ចូលបញ្ហាជាច្រើន ដូចជាការរីករាលដាលនៃជំងឺកូវីដ-១៩ ការប្រែប្រួលអាកាសធាតុ និងការឈ្លានពានរបស់ចិន ប៉ុន្តែមិនបានដោះស្រាយដោយផ្ទាល់ នូវការគំរាមកំហែងដែលបង្កឡើង ដោយកូរ៉េខាងជើងនោះទេ។

ប្រធានាធិបតីសហរដ្ឋអាមេរិក បានចេញសេចក្តីណែនាំនេះថា“ ថ្ងៃនេះខ្ញុំបានចេញសេចក្តីណែនាំ បណ្តោះអាសន្ននេះ ដើម្បីបង្ហាញចក្ខុវិស័យរបស់ខ្ញុំ អំពីវិធីដែលអាមេរិក នឹងចូលរួមជាមួយពិភពលោក ដោយសេចក្ដីណែនាំនេះ ត្រូវបានផ្សាយដោយសេតវិមាន៕

To Top