តេអេរ៉ង់៖ អ្នកនាំពាក្យក្រសួងការបរទេសអ៊ីរ៉ង់លោក Nasser Kanaani បានថ្កោលទោសមន្ត្រីតុលាការអាមេរិក ចំពោះការចោទប្រកាន់ថ្មីប្រឆាំងនឹងទីក្រុងតេអេរ៉ង់ ដោយគ្មានភស្តុតាងគួរឱ្យទុកចិត្តណាមួយដោយលើកឡើងថា ការផ្លាស់ប្តូរនេះគឺជាការបន្តនៃគោលនយោបាយបរាជ័យរបស់ទីក្រុងវ៉ាស៊ីនតោន។
លោក Kanaani បានធ្វើការកត់សម្គាល់នៅក្នុងសេចក្តីថ្លែងការណ៍មួយនៅលើគេហទំព័ររបស់ក្រសួងការបរទេសជាប្រតិកម្មទៅនឹងក្រសួងយុត្តិធម៌សហរដ្ឋអាមេរិក ដែលបានចោទប្រកាន់កាលពីថ្ងៃពុធសមាជិកនៃកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) ជាមួយនឹងការគ្រោងធ្វើឃាតលោក John Bolton ដែលបានបម្រើការជាទីប្រឹក្សាសន្តិសុខជាតិរបស់អតីតប្រធានាធិបតីលោក ដូណាល់ ត្រាំ។
អ្នកនាំពាក្យរូបនេះបានបន្ដថា ការអះអាងដែលគ្មានមូលដ្ឋានបែបនេះ គឺជាហេតុផលនយោបាយ និងជាផ្នែកមួយនៃការប៉ុនប៉ងរបស់សហរដ្ឋអាមេរិក ដើម្បីធ្វើឱ្យបរិយាកាសជុំវិញប្រទេសអ៊ីរ៉ង់ តាមរយៈការបើកយុទ្ធនាការឃោសនា និងការគេចចេញពីការទទួលខុសត្រូវចំពោះឧក្រិដ្ឋកម្មភេរវកម្មជាច្រើន ដែលរដ្ឋបាលសហរដ្ឋអាមេរិកបានប្រព្រឹត្តដោយផ្ទាល់ ដូចជាការធ្វើឃាតមេបញ្ជាការអ៊ីរ៉ង់ Qassem Soleimani ជាដើម ឬស្ថិតនៅពីក្រោយខ្នង ដូចក្រុមភេរវជនដែលប្រព្រឹត្តដោយក្រុមរដ្ឋឥស្លាមតាមរយៈការគាំទ្ររបស់ក្រុងវ៉ាស៊ីនតោន។
លោក Kanaani បានបន្ថែមថា ការបង្កើត រឿងនិទានគ្មានមូលដ្ឋាន កំពុងក្លាយជាដំណើរការកើតឡើងដដែលៗនៅក្នុងប្រព័ន្ធតុលាការ និងការឃោសនារបស់សហរដ្ឋអាមេរិក ដោយលោក Kanaani បានបន្ថែមថា នៅពេលនេះ ពួកគេបានងាកទៅរកការបង្កើតសេណារីយ៉ូដោយប្រើ “ធាតុដែលខូចផ្នែកនយោបាយ និងគ្មានតម្លៃ” ដូចជា John Bolton ដើម្បីបន្តទៅមុខជាមួយនឹងដំណើរការ។
លោក Kanaani បានកត់សម្គាល់ថា អ៊ីរ៉ង់ព្រមានយ៉ាងម៉ឺងម៉ាត់ប្រឆាំងនឹងទង្វើណាមួយប្រឆាំងនឹងជាតិរបស់ខ្លួនដោយផ្អែកលើការចោទប្រកាន់ “គួរឱ្យអស់សំណើច” ហើយសង្កត់ធ្ងន់ថា ខ្លួនរក្សាសិទ្ធិក្នុងការចាត់វិធានការណាមួយក្នុងក្របខ័ណ្ឌនៃច្បាប់អន្តរជាតិ ដើម្បីការពារសិទ្ធិរបស់ប្រទេស និងពលរដ្ឋរបស់ខ្លួន៕ប្រែសម្រួល ឈូក បូរ៉ា
