បរទេស៖ វិមានក្រឹមឡាំងបាននិយាយថា ប្រទេសរុស្ស៊ីរក្សាសិទ្ធិក្នុងការសងសឹក “គ្រប់ទីកន្លែង និងគ្រប់ពេលវេលា ដែលខ្លួនយល់ថាចាំបាច់” ដើម្បីឆ្លើយតបទៅនឹងការវាយប្រហារ ដោយយន្តហោះគ្មានមនុស្សបើកលើ គេហដ្ឋានរបស់ប្រធានាធិបតី វ្ល៉ាឌីមៀ ពូទីន។
យោងតាមសារព័ត៌មាន RT ចេញផ្សាយកាលពីថ្ងៃទី៣ ខែឧសភា ឆ្នាំ២០២៣ បានឱ្យដឹងថា ក្រុមមន្ត្រីបានអះអាងថា យន្តហោះគ្មានមនុស្សបើករបស់ អ៊ុយក្រែនចំនួនពីរគ្រឿងបានព្យាយាម វាយប្រហារវិមានក្រឹមឡាំងកាលពីព្រឹកថ្ងៃពុធ ប៉ុន្តែការវាយឆ្មក់ត្រូវបានរារាំង។
ការិយាល័យរបស់លោក ពូទីន បាននិយាយថា ប្រធានាធិបតីមិនមានការប៉ះពាល់នោះទេនៅក្នុង “ការវាយប្រហារភេរវកម្ម” នោះ ហើយអគារវិមានក្រឹមឡាំង មិនទទួលរងការខូចខាតណាមួយឡើយ ។
អ្នកនាំពាក្យរបស់ពូទីន លោក Dmitry Peskov បានប្រាប់ RIA Novosti ថា មេដឹកនាំរុស្ស៊ីមិននៅក្នុងវិមានក្រឹមឡាំង នៅពេលដែលការវាយឆ្មក់ បានកើតឡើងឡើយ។ លោកបានបន្ថែមថា លោកពូទីនកំពុងធ្វើការនៅឯគេហដ្ឋាន Novo-Ogaryovo របស់គាត់នៅជិតទីក្រុងមូស្គូកាលពីថ្ងៃពុធ។
ការវាយប្រហារនេះបានកើតឡើង នៅពេលដែលរុស្ស៊ីរៀបចំសម្រាប់ ការប្រារព្ធទិវាជ័យជំនះនៅថ្ងៃទី ៩ ឧសភា។ ចំណុចកណ្តាលនៃពិធីរំលឹកជ័យជំនះ ប្រឆាំងនឹងពួកណាស៊ីអាល្លឺម៉ង់ និងសម្ព័ន្ធមិត្តក្នុងសង្គ្រាមលោកលើកទី ២ គឺជាក្បួនដង្ហែយោធាប្រចាំឆ្នាំនៅលើទីលាន Red Square នៅខាងក្រៅជញ្ជាំងវិមានក្រឹមឡាំង ៕
ប្រែសម្រួលៈ ណៃ តុលា
