បរទេស៖ កងកម្លាំងអ៊ុយក្រែន បានបាញ់មីស៊ីលផ្លោងយ៉ាងតិចចំនួនពីរគ្រាប់ សំដៅទៅកាន់តំបន់គ្រីមៀ របស់រុស្ស៊ី កាលពីថ្ងៃសៅរ៍។ យ៉ាងណាក៏ដោយ មីស៊ីលត្រូវបានស្ទាក់ចាប់ដោយប្រព័ន្ធការពារប្រឆាំងយន្តហោះ។
យោងតាមសារព័ត៌មាន RT ចេញផ្សាយកាលពីថ្ងៃទី៦ ខែឧសភា ឆ្នាំ២០២៣ បានឱ្យដឹងថា ឧប្បត្តិហេតុនេះត្រូវបានបង្ហាញជាលើកដំបូងដោយប្រមុខ នៃសាធារណរដ្ឋគ្រីមេគឺលោក Sergey Aksenov នៅក្នុងការបង្ហោះប្រព័ន្ធ Telegram ។ លោកបានកំណត់អត្តសញ្ញាណមីស៊ីលមួយគ្រាប់ជាមីស៊ីលផ្លោងយុទ្ធសាស្ត្រ ដែលត្រូវបានបាញ់ចេញពីឧបករណ៍បាញ់បង្ហោះចល័ត Grom-2 របស់អ៊ុយក្រែន។ ខណៈពេលដែល Aksenov បាននិយាយថា មីស៊ីលមួយគ្រាប់ត្រូវបានបាញ់ ជំនួយរបស់គាត់បាននិយាយថា បន្តិចក្រោយមកថា មីស៊ីល Grom-2 ចំនួនពីរគ្រាប់ត្រូវបានបាញ់ ហើយទាំងពីរគ្រាប់ ត្រូវបានស្ទាក់ចាប់ដោយជោគជ័យ។
វីដេអូដែលបានចែករំលែក តាមអ៊ីនធឺណិត បង្ហាញពីរណ្ដៅធំមួយនៅកណ្តាលវាល ដែលត្រូវគេរាយការណ៍ថា បណ្តាលមកពីមីស៊ីល ដែលត្រូវបានចាប់ស្ទាក់។ វាត្រូវបានគេរាយការណ៍ថាបានធ្លាក់នៅជិតទីក្រុងឆ្នេរសមុទ្រ គ្រីមៀ ភាគអាគ្នេយ៍នៃ Alushta ។
សូមជម្រាបថា តំបន់ គ្រីមៀ គឺជាគោលដៅ នៃការវាយប្រហារដោយយន្តហោះគ្មានមនុស្សបើក និងមីស៊ីលរបស់រដ្ឋាភិបាលទីក្រុងគៀវម្តងហើយម្តងទៀត។ ការប៉ុនប៉ងវាយប្រហារឧបទ្វីបនេះទំនងជាមានឥទ្ធិពលខ្លាំងឡើង ក្នុងប៉ុន្មានសប្តាហ៍ថ្មីៗនេះ៕ ប្រែសម្រួលៈ ណៃ តុលា
