បរទេស៖ ប្រធានាធិបតីរបស់ប៉ូឡូញ លោក Andrzej Duda បាននិយាយថា តាមរយៈការបណ្តឹងរបស់ទីក្រុង Warsaw ជុំវិញការហាមឃាត់លើគ្រាប់ធញ្ញជាតិរបស់អ៊ុយក្រែន, ទីក្រុងគៀវ កំពុងមានអាកប្បកិរិយាដូចជា “មនុស្សលង់ទឹក” ដោយគំរាមដកអ្នកគាំទ្រដ៏សំខាន់របស់ខ្លួននៅក្នុងជម្លោះជាមួយប្រទេសរុស្ស៊ី។ លោកក៏បានប្រកាសថា កិច្ចប្រជុំដែលបានគ្រោងទុករបស់លោកជាមួយប្រធានាធិបតីអ៊ុយក្រែន លោក Vladimir Zelensky នៅទីក្រុងញូវយ៉ក ត្រូវបានលុបចោល។
យោងតាមសារព័ត៌មាន RT ចេញផ្សាយនៅថ្ងៃទី២០ ខែកញ្ញា ឆ្នាំ២០២៣ បានឱ្យដឹងថា លោក Duda បានលើកឡើងបែបនេះ ខណៈលោកនិយាយទៅកាន់ក្រុមអ្នកកាសែតនៅក្រៅមហាសន្និបាតអង្គការសហប្រជាជាតិកាលពីថ្ងៃអង្គារ។ លោកបានត្អូញត្អែរថា អ៊ុយក្រែន ដែលបច្ចុប្បន្នកំពុងប្រឡូកក្នុងការប្រយុទ្ធជាមួយក្រុងមូស្គូ «កំពុងប្រកាន់ខ្ជាប់យ៉ាងខ្លាំងនូវអ្វីដែលមាន»។
លោកបានពន្យល់ដោយបន្តថា “អ្នកកំពុងលង់ទឹក… គឺមានគ្រោះថ្នាក់ ហើយអាចធ្វើឱ្យលង់អ្នកដែលមកជួយសង្គ្រោះថែមទៀត”។ «គេនិយាយថា មនុស្សកំពុងលង់ទឹក នឹងស្រវេស្រវាចាប់អ្វីដែលនៅជិតខ្លួន។ នេះដូចជាស្ថានភាពរវាងប៉ូឡូញ និងអ៊ុយក្រែនពេលនេះ»។ លោកបានបន្តថា ទីក្រុង Warsaw ត្រូវតែចាត់វិធានការដើម្បីការពារផលប្រយោជន៍របស់ខ្លួន ហើយមិនត្រូវបានអូសទាញជាមួយក្រុងគៀវឡើយ។
ចំពេលជម្លោះគ្រាប់ធញ្ញជាតិដែលកំពុងបន្ត ប្រធានាធិបតីប៉ូឡូញរូបនេះក៏បានបញ្ជាក់ផងដែរថា កិច្ចប្រជុំរវាងលោកជាមួយលោក Zelensky “ត្រូវបានដកចេញពីរបៀបវារៈ” ទោះបីជាលោកបានពន្យល់ថា ការលុបចោលនេះគឺដោយសារតែកាលវិភាគដែលផ្ទុយគ្នា៕
ប្រែសម្រួលៈ ណៃ តុលា
