បរទេស៖ លោក Aleksey Danilov លេខាធិការនៃក្រុមប្រឹក្សាសន្តិសុខ និងការពារជាតិអ៊ុយក្រែន បានទទូចថា គ្មានពលរដ្ឋអ៊ុយក្រែនណាម្នាក់ ដែលគួរត្រូវបានលើកលែង ពីការបម្រើប្រទេសរបស់ពួកគេនោះទេ និងត្រូវជួយប្រទេសក្នុងជម្លោះជាមួយរុស្ស៊ី។
យោងតាមសារព័ត៌មាន RT ចេញផ្សាយនៅថ្ងៃទី៣ ខែវិច្ឆិកា ឆ្នាំ២០២៣ បានឱ្យដឹងថា នៅក្នុងបទសម្ភាសន៍ជាមួយប្រព័ន្ធផ្សព្វផ្សាយ Liga កាលពីថ្ងៃព្រហស្បតិ៍ លោក Danilov បានពណ៌នាអំពីគំនិតដែលថា ជនជាតិអ៊ុយក្រែនគ្រប់រូប “ត្រូវតែប្រយុទ្ធនឹងសង្គ្រាម ឬអនុវត្តសេវាកម្ម” ជា “ការពិតជាមូលដ្ឋាន” ។ “មនុស្សម្នាក់មិនគួរភ្ញាក់ផ្អើលទេ, យើងរស់នៅក្នុងពិភពលោកដ៏ស្មុគស្មាញមួយ ដែលយើងត្រូវការពារប្រទេសរបស់យើង ជាមួយនឹងអ្នកជិតខាងដ៏ឆ្កួតលីលាក្បែរនោះ»។
លោកក៏បានលើកឡើងនូវអត្ថបទថ្មីៗនៅក្នុង Telegraph ដោយអតីតរដ្ឋមន្ត្រីការពារជាតិចក្រភពអង់គ្លេស លោក Ben Wallace ដែលបានចង្អុលបង្ហាញថា “អាយុជាមធ្យមរបស់ទាហាន [អ៊ុយក្រែន] នៅជួរមុខគឺលើសពី ៤០ ឆ្នាំ” ហើយបានស្នើថា ទីក្រុងគៀវ គួរតែវាយតម្លៃឡើងវិញនូវទំហំ នៃការចល័តរបស់ខ្លួនដោយ ពង្រាងយុវជនបន្ថែមទៀត។
ដោយបានសង្កត់លើថាតើទីក្រុងគៀវមានគម្រោង ដកផ្នែកណាមួយនៃកងទ័ពរបស់ខ្លួន ជាពិសេសទាហានដែលបាន ប្រយុទ្ធអស់រយៈពេលជាច្រើនខែនោះ មន្ត្រីរូបនេះនឹងមិននិយាយថាតើមន្ត្រីកំពូល របស់ប្រទេសនេះបានពិភាក្សាអំពីបញ្ហានេះដែរឬទេ។ ទោះយ៉ាងណាលោកបានបន្ថែមថា ប្រសិនបើការសម្រេចត្រូវធ្វើឡើង គួរតែមានទម្រង់ជាច្បាប់ ៕
ប្រែសម្រួលៈ ណៃ តុលា
