ប៉េកាំង៖ រដ្ឋមន្ត្រីក្រសួងបរិស្ថានចិន បានជំរុញឱ្យប្រទេសជប៉ុន បំពេញកាតព្វកិច្ចអន្តរជាតិ របស់ខ្លួនដោយស្មោះត្រង់ ចូលរួមក្នុងការពិគ្រោះយោបល់ ឱ្យបានហ្មត់ចត់ជាមួយអ្នក ពាក់ព័ន្ធដទៃទៀត និងបោះចោលទឹកកខ្វក់នុយក្លេអ៊ែរ តាមរបៀបវិទ្យាសាស្ត្រ និងប្រកបដោយការទទួលខុសត្រូវ។
ដោយកត់សម្គាល់ថា ការចោលទឹកកខ្វក់ដោយនុយក្លេអ៊ែរទាក់ទង នឹងប្រព័ន្ធអេកូឡូស៊ីសមុទ្រពិភពលោក និងសុខភាពសាធារណៈ រដ្ឋមន្ត្រីក្រសួងបរិស្ថាន និងបរិស្ថានចិនលោក Huang Runqiu បានធ្វើការកត់សម្គាល់ក្នុងពិធីបើកកិច្ចប្រជុំរដ្ឋមន្ត្រីបរិស្ថាន ត្រីភាគីលើកទី២៤ រវាងប្រទេសចិន ជប៉ុន និងកូរ៉េខាងត្បូង។
កិច្ចប្រជុំនេះត្រូវបានធ្វើឡើង នៅទីក្រុងណាហ្គោយ៉ា របស់ប្រទេសជប៉ុន ពីថ្ងៃសុក្រដល់ថ្ងៃសៅរ៍ ។ លោក Huang បានកត់សម្គាល់បន្ថែមទៀត នៅក្នុងសន្និសីទសារព័ត៌មាន បន្ទាប់ពីកិច្ចប្រជុំនោះ ប្រទេសជប៉ុន គួរតែបង្កើតយន្តការត្រួតពិនិត្យ អន្តរជាតិរយៈពេលវែងមួយភ្លាមៗ ដែលរួមមានប្រទេសជិតខាងពាក់ព័ន្ធ ដើម្បីការពារប្រកបដោយប្រសិទ្ធភាព នូវប្រព័ន្ធអេកូឡូស៊ីសមុទ្រពិភពលោក។
លោក Huang បានលើកឡើងថា ប្រទេសចិន ជប៉ុន និងកូរ៉េខាងត្បូង ជាដៃគូសហប្រតិបត្តិការដ៏សំខាន់ ចែករំលែកភាពជិតខាងភូមិសាស្ត្រ និងទំនាក់ទំនងវប្បធម៌ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
ប្រទេសចិនមានឆន្ទៈបន្តពង្រឹងកិច្ចសហប្រតិបត្តិការ ជាមួយប្រទេសទាំងពីរ ក្នុងការអនុវត្តពហុភាគី និយមពិតប្រាកដ និងរួមគ្នាលើកកម្ពស់ភាព ជោគជ័យនៃដំណើរការពហុភាគីបរិស្ថានសំខាន់ៗ រួមទាំងសម័យប្រជុំលើកទី២៨ នៃសន្និសីទភាគី (COP28) ទៅកាន់អង្គការសហប្រជាជាតិ អនុសញ្ញាក្របខ័ណ្ឌ ស្តីពីការប្រែប្រួលអាកាសធាតុ សន្ធិសញ្ញាប្លាស្ទីកសកល និងសភាបរិស្ថានរបស់អង្គការសហប្រជាជាតិ។
លោកបានបន្ថែមថា កិច្ចខិតខំប្រឹងប្រែងនឹងត្រូវបានធ្វើឡើង ដើម្បីចែករំលែកបទពិសោធន៍ នៃកិច្ចសហប្រតិបត្តិការបរិស្ថានត្រីភាគី ជាមួយដៃគូបន្ថែមទៀត ដើម្បីរួមចំណែកថ្មី និងកាន់តែធំដល់ការអភិវឌ្ឍន៍ ប្រកបដោយចីរភាពក្នុងតំបន់ និងពិភពលោក។
គណៈប្រតិភូនីមួយៗដឹកនាំដោយលោក Huang រដ្ឋមន្ត្រីក្រសួងបរិស្ថានជប៉ុន Shintaro Ito និងរដ្ឋមន្ត្រីក្រសួងបរិស្ថានកូរ៉េខាងត្បូង Han Jeoung-ae បានចូលរួមក្នុងកិច្ចប្រជុំនេះ ដែលជាកន្លែង ដែលពួកគេបានចែករំលែកគោលនយោបាយបរិស្ថានជាតិរៀងៗខ្លួន និងការវិវត្តន៍នាពេលថ្មីៗនេះ ព្រមទាំងផ្លាស់ប្តូរយោបល់ លើបញ្ហាបរិស្ថាន ការព្រួយបារម្ភទៅវិញទៅមកក្នុងតំបន់ និងពិភពលោក។
ការអនុវត្តផែនការសកម្មភាពរួមត្រីភាគី លើកិច្ចសហប្រតិបត្តិការបរិស្ថានឆ្នាំ ២០២១-២០២៥ ត្រូវបានពិនិត្យនៅក្នុងកិច្ចប្រជុំ ហើយសេចក្តីថ្លែងការណ៍រួម នៃកិច្ចប្រជុំរដ្ឋមន្ត្រីបរិស្ថានត្រីភាគីលើកទី ២៤ ត្រូវបានចុះហត្ថលេខារួមគ្នា៕
ប្រែសម្រួល ឈូក បូរ៉ា
