បរទេស ៖ យោងតាមការចេញផ្សាយរបស់ RT ប្រធានទីភ្នាក់ងារជនភៀសខ្លួន ប៉ាឡេស្ទីនរបស់អង្គការ សហប្រជាជាតិបានអះអាងថា កងកម្លាំងការពារអ៊ីស្រាអែល ហៅកាត់ថាIDFកំពុងរៀបចំដំណាក់កាលសម្រាប់ការបណ្ដេញប្រជាជនប៉ាឡេស្ទីន យ៉ាងច្រើនចូលទៅក្នុងប្រទេសអេហ្ស៊ីប ខណៈពេលដែលបង្កើតលក្ខខណ្ឌ ដែលនឹងធ្វើឱ្យពួកគេមិនអាចត្រឡប់ទៅផ្ទះដែលត្រូវបានបំផ្លាញរបស់ពួកគេ នៅក្នុងតំបន់ហ្គាហ្សាថែមទៀតផង។
ដោយឡែកប្រធានទីភ្នាក់ងារ ជំនួយ និងការងាររបស់អង្គការសហប្រជាជាតិ (UNRWA) លោក Philippe Lazzarini បានសំភាសកាលពីថ្ងៃសៅរ៍ ជាមួយនឹងកាសែត Los Angeles Times ថា ៖អង្គការសហប្រជាជាតិ និងរដ្ឋ ជាសមាជិកមួយចំនួន រួមទាំងសហរដ្ឋអាមេរិក បានច្រានចោលយ៉ាងម៉ឺងម៉ាត់ ចំពោះការបណ្តេញពលរដ្ឋ ក្នុងតំបន់ហ្គាហ្សាចេញ ពីតំបន់ហ្គាហ្សាស្ទ្រីប។
លោកបន្តថា៖ប៉ុន្តែទោះបីជាយ៉ាងណា ក្តីការវិវត្តន៍ដែលយើងកំពុងធ្វើជាសាក្សីចង្អុលបង្ហាញដល់ការប៉ុនប៉ងផ្លាស់ប្តូរជនជាតិប៉ាឡេស្ទីនទៅក្នុងប្រទេសអេហ្ស៊ីប មិនថាពួកគេស្នាក់នៅទីនោះ ឬត្រូវបានតាំងទីលំនៅកន្លែងផ្សេងទៀតនោះទេ។
អ្នកនាំពាក្យក្រសួងការពារជាតិអ៊ីស្រាអែល បានបដិសេធការចោទប្រកាន់របស់ Lazzarini ដោយនិយាយថា អ៊ីស្រាអែលមិនដែលមានផែនការ រុញពលរដ្ឋប៉ាឡេស្ទីនចូលទៅក្នុងអេហ្ស៊ីបទេ ខណៈដែលកន្លងមក សមាជិកសភាអ៊ីស្រាអែលពីរនាក់ បានប្រាប់កាសែត Wall Street Journal op-ed ថាពួកគេចង់ឃើញប្រទេសជុំវិញពិភពលោកស្វាគមន៍ជនភៀសខ្លួនពីតំបន់ហ្គាហ្សា ដែលជ្រើសរើសផ្លាស់ប្តូរទីលំនៅរបស់ពួកគេ៕
ប្រែសម្រួល៖ស៊ុនលី
