បរទេស ៖ យោងតាមការចេញផ្សាយ របស់ RT អ្នកនាំពាក្យក្រសួង ការបរទេស អាមេរិក លោក Matthew Miller បាននិយាយ កាលពីថ្ងៃព្រហស្បតិ៍ថា កម្រិតនៃការផ្តល់មូលនិធិ យោធារបស់ទីក្រុងវ៉ាស៊ីនតោន សម្រាប់អ៊ុយក្រែន អាចនឹងថយចុះជាពិសេស នៅពេលដែលប្រទេសនេះ អាចឈរនៅលើជើងពីររបស់ខ្លួនបាន។
លោក Miller បានធ្វើការកត់សម្គាល់ក្នុង អំឡុងពេលសន្និសីទសារព័ត៌មាន ជាទៀងទាត់ដោយឆ្លើយតបទៅនឹងសំណួរ ស្តីពីការផ្លាស់ប្តូរសក្តានុពល នៅក្នុងយុទ្ធសាស្រ្ត របស់សហរដ្ឋអាមេរិក ស្តីពីអ៊ុយក្រែន ។
អ្នកនាំពាក្យរូបនេះបានទទូចថា ក្រុងវ៉ាស៊ីនតោនតែងតែស្វែង រកឱ្យអ៊ុយក្រែន ក្លាយជាប្រទេស ដែលអាចការពារខ្លួនដោយខ្លួនឯង ហើយទីបំផុត ក្លាយជាប្រទេសឯករាជ្យ។
លោកបន្តថា៖ យើងតែងតែបញ្ជាក់យ៉ាង ច្បាស់ថា យើងចង់ឱ្យអ៊ុយក្រែនជាប្រទេសឯករាជ្យ។ នោះមានន័យថា វាអាចឈរនៅលើជើង ពីរដោយខ្លួនឯងបាន ប៉ុន្តែយើងនឹងបន្តគាំទ្រអ៊ុយក្រែន នោះជាគោលនយោបាយរបស់សហរដ្ឋអាមេរិក ដរាបណាវានៅតែត្រូវការ ។
លោកបានព្រមានថា ទោះបីជាយ៉ាងណាក៏ដោយ ការផ្តល់មូលនិធិយោធា សម្រាប់រដ្ឋាភិបាលទីក្រុងគៀវ នឹងត្រូវស្ងួតហួតហែង នៅចំណុចណាមួយ នាពេលអនាគតទោះបី ពេលនោះមិនទាន់មកដល់នៅឡើយក្តី៕
ប្រែសម្រួល៖ស៊ុនលី
