វ៉ាស៊ីនតោន៖ កងទ័ពអាកាសអាមេរិកបានឲ្យដឹងថា ខ្លួនបានរកឃើញឧបករណ៍ថតទិន្នន័យហោះហើរពីយន្តហោះ Osprey របស់ខ្លួនដែលបានធ្លាក់ចេញពីកោះភាគនិរតីនៃប្រទេសជប៉ុនកាលពីចុងខែវិច្ឆិកា ហើយការវិភាគលើកំណត់ត្រាត្រូវបានគេរំពឹងថា នឹងចំណាយពេលជាច្រើនសប្តាហ៍។
ឧបករណ៍ថតសំឡេង ដែលត្រូវបានគេស្គាល់ថាជាប្រអប់ខ្មៅ និងឧបករណ៍សំខាន់ៗផ្សេងទៀតសម្រាប់ការស៊ើបអង្កេត ដែលកំពុងបន្តនៃឧបទ្ទវហេតុគ្រោះថ្នាក់នេះនឹងត្រូវបញ្ជូនទៅមន្ទីរពិសោធន៍ដើម្បីទាញយកទិន្នន័យ នេះបើយោងតាមបញ្ជាការប្រតិបត្តិការពិសេសរបស់កងទ័ពអាកាស។
យន្តហោះ CV-22 Osprey របស់កងទ័ពអាកាសបានធ្លាក់ចេញពីកោះ Yakushima កាលពីថ្ងៃទី២៩ ខែវិច្ឆិកា អំឡុងពេលធ្វើសមយុទ្ធជាប្រចាំ ដោយបានសម្លាប់មនុស្សទាំងប្រាំបីនាក់នៅលើយន្តហោះ tilt-rotor ។
អាជ្ញាធរជប៉ុន បានបញ្ជាក់កាលពីចុងខែធ្នូថា បំណែកពីយន្តហោះ Osprey រួមទាំងប្រអប់ខ្មៅ ត្រូវបានទាញចេញពីសមុទ្រ ហើយបានមកដល់ស្ថានីយ៍អាកាស Marine Corps Air Iwakuni ។
បញ្ជាការរបស់សហរដ្ឋអាមេរិកបានឲ្យដឹងថា បំណែកនៃបំណែកយន្តហោះភាគច្រើនស្ថិតនៅមូលដ្ឋាន ដែលត្រូវត្រួតពិនិត្យជាផ្នែកមួយនៃការស៊ើបអង្កេតដែលកំពុងបន្ត។
នៅក្នុងប្រទេសជប៉ុន ដែលជាសម្ព័ន្ធមិត្តសន្ធិសញ្ញាដ៏សំខាន់របស់សហរដ្ឋអាមេរិក ការព្រួយបារម្ភអំពីសុវត្ថិភាពរបស់យន្តហោះ ដែលត្រូវបានគេស្គាល់ថាមានឧបទ្ទវហេតុ និងការធ្លាក់ដ៏ធ្ងន់ធ្ងរជាច្រើនបានផ្ទុះឡើងជាថ្មី៕ ប្រែសម្រួល ឈូក បូរ៉ា
