បរទេស ៖ អ្នកនាំពាក្យក្រុមឧទ្ទាម ហួធី លោក Abdulsalam Jahaf បាននិយាយ នៅព្រឹកថ្ងៃសុក្រថា សហរដ្ឋអាមេរិក និងចក្រភពអង់គ្លេស បានបើកការវាយប្រហារ លើប្រទេសយេម៉ែន ដោយវាយលុកទីក្រុង Sanaa និង Hodeidah ។
យោងតាមសារព័ត៌មាន RT ចេញផ្សាយនៅថ្ងៃទី១២ ខែមករា ឆ្នាំ២០២៤ បានឱ្យដឹងថា ទីក្រុងវ៉ាស៊ីនតោន និងទីក្រុងឡុងដ៍ មិនទាន់បានធ្វើការប្រកាសជាផ្លូវការនៅឡើយទេ ។ ទោះជាយ៉ាងណាក៏ដោយ សារព័ត៌មានជាច្រើនរបស់អង់គ្លេស និងអាមេរិក បានផ្សាយដោយដកស្រង់ ប្រភពអនាមិកនៅខាង ក្នុងសេតវិមាន និង វិមាន 10 Downing Street ថា ការវាយប្រហារមួយគឺ “ជិតមកដល់” នៅល្ងាចថ្ងៃព្រហស្បតិ៍ ។
អ្នកនាំពាក្យក្រុម ឧទ្ទាម ហួធី លោក Abdulsalam Jahaf បាននិយាយនៅលើ X (អតីត Twitter) ថា “ឥឡូវនេះអាមេរិក អង់គ្លេស និងអ៊ីស្រាអែល កំពុងបើកការវាយឆ្មក់លើទីក្រុង Hodeidah, Sanaa, Dhamar និង Saada” ។ «យើងនឹងដាក់ទោសពួកគេ »។
សារព័ត៌មាន រ៉យទ័រ បានរាយការណ៍ដោយដកស្រង់សម្តីសាក្សីក្នុងតំបន់ថា មានការផ្ទុះយ៉ាងហោចណាស់ចំនួនបីនៅក្នុងទីក្រុង Sanaa។
ត្រូវបានគេស្គាល់ជាផ្លូវការថា Ansar Allah (‘អ្នកគាំទ្រព្រះជាម្ចាស់’) ក្រុម ឧទ្ទាម ហួធី បានប្រកាសសាមគ្គីភាពជាមួយតំបន់ Gaza នៅចុងខែតុលា ដោយប្រតិកម្មទៅនឹងការវាយលុករបស់អ៊ីស្រាអែលប្រឆាំងនឹងតំបន់ប៉ាឡេស្ទីន។ ចាប់តាំងពីពេលនោះមក ពួកគេបានធ្វើការវាយប្រហារជាង ២០ លើនាវាដឹកជញ្ជូនផ្សេងៗនៅក្នុងសមុទ្រក្រហម ដែលជាផ្លូវពាណិជ្ជកម្មដ៏សំខាន់មួយតភ្ជាប់អឺរ៉ុប និងអាស៊ី តាមរយៈព្រែកជីកស៊ុយអេ។ ក្រុមហ៊ុនដឹកជញ្ជូនធំៗបានឆ្លើយតបដោយការបញ្ជូនកប៉ាល់របស់ពួកគេឡើងវិញជុំវិញទ្វីបអាហ្រ្វិក ដោយជំរុញឱ្យតម្លៃ និងថ្លៃធានារ៉ាប់រងកើនឡើង។
កាលពីថ្ងៃអង្គារ ទីបញ្ជាការកណ្តាលរបស់សហរដ្ឋអាមេរិកបានប្រកាសថា កប៉ាល់ និងយន្តហោះរបស់ខ្លួនបានបាញ់ទម្លាក់កាំជ្រួច និងយន្តហោះគ្មានមនុស្សបើកជាង ២០ ក្នុងសមុទ្រក្រហម៕
ប្រែសម្រួលៈ ណៃ តុលា
