ហ្គាហ្សា៖ រាប់ម៉ឺនគ្រួសារទាំងនៅអ៊ីស្រាអែល និងប៉ាឡេស្ទីន នៅតែសោកសៅ ចំពោះការបាត់បង់មនុស្សជាទីស្រលាញ់របស់ពួកគេកាលពីថ្ងៃអាទិត្យ ដែលមានរយៈពេល ១០០ថ្ងៃបន្ទាប់ពីការវាយប្រហារដោយមិនបានរំពឹងទុករបស់ក្រុមហាម៉ាសលើភាគខាងត្បូងអ៊ីស្រាអែល បានបង្កឱ្យមានយុទ្ធនាការយោធាអ៊ីស្រាអែល ដ៏ធំនៅក្នុងតំបន់ហ្គាហ្សាស្ទ្រីប។
ទោះបីជាមានការអំពាវនាវម្តងហើយម្តងទៀតពីសហគមន៍អន្តរជាតិឱ្យបញ្ចប់អំពើហិង្សា ដែលកំពុងបន្ត និងការវិលត្រឡប់ទៅរកសន្តិភាពក៏ដោយ ជម្លោះអ៊ីស្រាអែល និងក្រុមហាម៉ាស់ ដែលបានអង្រួនទិដ្ឋភាពភូមិសាស្ត្រនយោបាយនៅមជ្ឈិមបូព៌ា បង្ហាញសញ្ញាថានឹងថយចុះនៅពេលឆាប់ៗនេះ។
ជាងបីខែនៅក្នុងជម្លោះ អ៊ីស្រាអែលបានដកកងទ័ពរបស់ខ្លួនមួយចំនួនចេញពីតំបន់ហ្គាហ្សាស្ទ្រីប ដើម្បីឆ្លើយតបទៅនឹងការទាមទាររបស់សហរដ្ឋអាមេរិក ក្នុងការស្តារឡើងវិញនូវប្រតិបត្តិការជើងគោក និងដែនអាកាសទ្រង់ទ្រាយធំ និងការពារជនស៊ីវិលនៅក្នុងក្របខណ្ឌប៉ាឡេស្ទីន។
កាលពីថ្ងៃទី០៧ ខែមករា រដ្ឋមន្ត្រីការពារជាតិអ៊ីស្រាអែល លោក Yoav Gallant បានប្រាប់កាសែត Wall Street Journal ថាឆាប់ៗនេះ កងទ័ពអ៊ីស្រាអែល នឹងប្តូរពីដំណាក់កាលសមយុទ្ធដ៏ខ្លាំងក្លានៃសង្រ្គាម ទៅជាប្រភេទប្រតិបត្តិការពិសេសផ្សេងៗ នៅភាគខាងជើងហ្គាហ្សា។
ប្រតិបត្តិការលើដី និងការទម្លាក់គ្រាប់បែករបស់អ៊ីស្រាអ៊ែល ខណៈពេលដែលមិនសូវខ្លាំងជាងពេលមុន នៅតែបន្ត ដោយផ្តោតលើតំបន់ភាគខាងត្បូងនៃតំបន់ហ្គាហ្សាស្ទ្រីប ជាកន្លែងដែលប្រជាជនមួយចំនួនធំត្រូវជាប់គាំង បន្ទាប់ពីត្រូវបានផ្លាស់ទីលំនៅពីភាគខាងជើង និងកន្លែងផ្សេងទៀត៕
ប្រែសម្រួល ឈូក បូរ៉ា
