ហ្គាហ្សា៖ ក្រសួងសុខាភិបាលមានមូលដ្ឋាន នៅតំបន់ហ្គាហ្សា បានឲ្យដឹងថា ចំនួនអ្នកស្លាប់ជនជាតិប៉ាឡេស្ទីន ពីការវាយប្រហាររបស់អ៊ីស្រាអែល ដែលកំពុងបន្តលើតំបន់ហ្កាហ្សា បានកើនឡើងដល់ ២៤,២៨៥ នាក់។
ក្រសួងបានឲ្យដឹង នៅក្នុងសេចក្តីថ្លែងការណ៍មួយថា កងទ័ពអ៊ីស្រាអែល បានសម្លាប់ជនជាតិប៉ាឡេស្ទីនចំនួន ១៥៨នាក់ និងរបួសចំនួន ៣២០នាក់ផ្សេងទៀតក្នុងរយៈពេល ២៤ម៉ោងកន្លងមកនេះ។
ប្រភពបានបន្ថែមថា ជម្លោះអ៊ីស្រាអែល និងក្រុមហាម៉ាស ដែលកំពុងបន្តបាននាំឱ្យមានការរងរបួសរបស់ជនជាតិប៉ាឡេស្ទីនចំនួន ៦១,១៥៤ នាក់ចាប់តាំងពីការផ្ទុះឡើងនៅថ្ងៃទី០៧ ខែតុលាឆ្នាំ២០២៣ ។
ទន្ទឹមនឹងនេះ ប្រភពបានកត់សម្គាល់ថា ជនរងគ្រោះមួយចំនួនធំ នៅតែស្ថិតនៅក្រោមគំនរបាក់បែក ហើយរថយន្តសង្គ្រោះបន្ទាន់ និងក្រុមការពារស៊ីវិល មិនអាចទៅដល់ពួកគេបានឡើយ។
ក្រសួងក៏បានព្រមានផងដែរ អំពីផលវិបាកសុខភាពធ្ងន់ធ្ងរ ដែលប្រឈមមុខនឹងអ្នកជំងឺដែលមានជំងឺរ៉ាំរ៉ៃ ដោយកត់សម្គាល់ថា មនុស្សចំនួន ៣៥ម៉ឹននាក់ក្នុងចំណោមពួកគេមិនមានថ្នាំព្យាបាលនោះទេ ហើយប្រភពខាងលើ បានអំពាវនាវឱ្យស្ថាប័ន អន្តរជាតិផ្តល់ថ្នាំ សម្រាប់អ្នកជំងឺរ៉ាំរ៉ៃជាបន្ទាន់៕
