សេអ៊ូល៖ ប្រភពពីទីភ្នាក់ងារ Xinhua បានផ្សព្វផ្សាយនៅថ្ងៃទី១៩ ខែមករា ឆ្នាំ២០២៤ថា ប្រព័ន្ធផ្សព្វផ្សាយរដ្ឋ ហៅកាត់ថា KCNA បានផ្សព្វផ្សាយឲ្យដឹង នៅថ្ងៃសុក្រនេះថា ប្រទេសកូរ៉េ ខាងជើង បានធ្វើការសាកល្បង ប្រព័ន្ធអាវុធនុយក្លេអ៊ែរក្រោមទឹករបស់ខ្លួន ដើម្បីធ្វើការតវ៉ាប្រឆាំងនឹង ការធ្វើសមយុទ្ធយោធារួមគ្នានៅក្នុងសប្តាហ៍នេះ ដោយរួមមាន កូរ៉េខាងត្បូង សហរដ្ឋអាមេរិក និងប្រទេសជប៉ុន ។
សេចក្តីរាយការណ៍បានដាក់ថា ការសាកល្បងប្រព័ន្ធ “Haeil-5-23 ” ដែលជាឈ្មោះដែលកូរ៉េខាងជើង បានផ្តល់ដល់យន្តហោះគ្មានមនុស្ស បើកវាយប្រហារក្រោមទឹក ដែលមានសមត្ថភាពនុយក្លេអ៊ែរ ត្រូវបានធ្វើឡើងដោយការគិតគូ របស់ក្រសួងការពារជាតិនៅក្នុងដែនទឹក នៃឆ្នេរសមុទ្រភាគខាងកើតរបស់ខ្លួន ។
អ្នកនាំពាក្យសុំមិនបញ្ចេញឈ្មោះមកពីក្រសួងការពារជាតិ បានចោទប្រកាន់សហរដ្ឋអាមេរិក កូរ៉េខាងត្បូង និងជប៉ុនថា ធ្វើឲ្យ“មានការភ័យខ្លាច” ជាមួយនឹងការធ្វើសមយុទ្ធយោធា ដោយបានព្រមានពី “ផលវិបាកនៃគ្រោះមហន្តរាយ” ។
កងទ័ពជើងទឹកនៃប្រទេសទាំង៣បានធ្វើសមយុទ្ធជាទៀងទាត់រយៈពេល៣ថ្ងៃរហូតដល់ថ្ងៃពុធ រួមជាមួយនាវាផ្ទុកយន្តហោះសហរដ្ឋអាមេរិក Carl Vinson ដែលជាផ្នែកមួយនៃកិច្ចខិតខំប្រឹងប្រែងដើម្បីកែលម្អលើការឆ្លើយតបរបស់ពួកគេចំពោះការវិវត្តន៍នៃការគំរាមកំហែងនុយក្លេអ៊ែរ និងមីស៊ីលរបស់ក្រុងព្យុងយ៉ាង ៕
ប្រែសម្រួលដោយ៖ ម៉ៅ បុប្ផាមករា
