តូក្យូ ៖ ប្រភពការទូតបានឲ្យដឹងថា មន្ត្រីជាន់ខ្ពស់ នៃរដ្ឋាភិបាលយោធា មីយ៉ាន់ម៉ា បានចូលរួមកិច្ចប្រជុំរដ្ឋមន្ត្រីការបរទេស នៃសមាគមប្រជាជាតិអាស៊ីអាគ្នេយ៍ នៅប្រទេសឡាវ ក្នុងនាមជាអ្នកតំណាងមិននយោបាយ។
ការចូលរួមរបស់មន្ត្រីជាន់ខ្ពស់ក្រសួងការបរទេស នៅក្នុងកិច្ចប្រជុំនៅទីក្រុងហ្លួងប្រាបាង ដែលបានចាប់ផ្តើម កាលពីថ្ងៃអាទិត្យកើតឡើង នៅមុនខួបលើកទី៣ នៃរដ្ឋប្រហារយោធា ដែលបានផ្តួលរំលំរដ្ឋាភិបាលជាប់ឆ្នោត តាមបែបប្រជាធិបតេយ្យ របស់ប្រទេសមីយ៉ាន់ម៉ា របស់មេដឹកនាំស៊ីវិលលោកស្រី អ៊ុងសាន ស៊ូជី នៅថ្ងៃទី០១ ខែកុម្ភៈ ឆ្នាំ២០២១ ។
ប្រទេសមីយ៉ាន់ម៉ា បានធ្វើពហិការមិនចូលរួមកិច្ចប្រជុំ ថ្នាក់រដ្ឋមន្ត្រីចាប់តាំងពីសមាជិកអាស៊ាន បានសម្រេចចិត្តក្នុងខែតុលា ឆ្នាំ២០២១ ដើម្បីអនុញ្ញាតឱ្យមានតែតំណាង មិននយោបាយមកពីប្រទេសចូលរួម ។
ប្រធានអាស៊ានឆ្នាំនេះ ឡាវ មានឆន្ទៈចូលរួមជាមួយរបបយោធាមីយ៉ាន់ម៉ា។ ដំបូងឡើយ របបយោធាបានស្វែងរកមន្ត្រីជាន់ខ្ពស់ ដូចជារដ្ឋមន្ត្រីការបរទេសរបស់ខ្លួន ចូលរួមកិច្ចប្រជុំ ប៉ុន្តែផែនការនេះត្រូវបានសមាជិកអាស៊ានបដិសេធ។
របបយោធាបានបង្ក្រាបក្រុមបាតុករ គាំទ្រលទ្ធិប្រជាធិបតេយ្យយ៉ាងហិង្សា ប៉ុន្តែការប្រយុទ្ធគ្នារវាងរបបនេះ និងក្រុមជនជាតិបានកាន់តែខ្លាំងឡើងតាំងពីខែតុលា ៕
ប្រែសម្រួល ឈូក បូរ៉ា
