បរទេស៖យោងតាមការចេញផ្សាយរបស់ RT នាយករដ្ឋមន្ត្រីចាំផ្ទះរបស់ប្រទេសលីបង់ លោក Najib Mikati បានប៉ាន់ប្រមាណថា ការវាយប្រហារតាមអាកាសរបស់អ៊ីស្រាអែល ទៅលើកន្លែងរបស់ក្រុម Hezbollah នៅក្នុងប្រទេសលីបង់ បានបង្ខំមនុស្សប្រហែលមួយលាននាក់ឱ្យភៀសខ្លួនចេញពីផ្ទះសំបែងរបស់ពួកគេ។
លោកនាយករដ្ឋមន្ត្រីរូបនេះក៏បានអះអាងដែរថា វិសាលភាពនៃការភៀសខ្លួនលើកនេះគឺមិនធ្លាប់មានពីមុនមកក្នុងប្រវត្តិសាស្ត្ររបស់ប្រទេសឡើយ។
គួរឲ្យដឹងដែរថាអ៊ីស្រាអែល និងក្រុមហេសបូឡាបានផ្ទុះអាវុធជាបន្តបន្ទាប់ ចាប់តាំងពីអតីតបានបើកប្រតិបត្តិការយោធានៅតំបន់ហ្គាហ្សា ដើម្បីឆ្លើយតបទៅនឹងការលុកលុយ ដ៏សាហាវរបស់ក្រុមហាម៉ាសកាលពីថ្ងៃទី៧ ខែតុលា។
អ៊ីស្រាអែលបានបង្កើនយុទ្ធនាការប្រឆាំងក្រុមសកម្មប្រយុទ្ធស៊ីអ៊ីត យ៉ាងធ្ងន់ធ្ងរនៅដើមខែនេះ ដោយបានធ្វើឲ្យមនុស្សរាប់ពាន់នាក់រងរបួសក្នុងប្រតិបត្តិការបំផ្លិចបំផ្លាញដែលផ្តោតលើ ឧបករណ៍ទំនាក់ទំនងដៃរបស់ក្រុមផងដែរ។
ការវាយប្រហារនេះត្រូវបានធ្វើឡើងបន្ត ដោយរលកនៃការវាយប្រហារ តាមអាកាសដែលជាផ្នែកមួយនៃ ប្រតិបត្តិការព្រួញខាងជើងឬ Operation Norther Arrows របស់កងកម្លាំងការពារអ៊ីស្រាអែល ហើយជាលទ្ធផល យោងតាមអាជ្ញាធរសុខាភិបាលលីបង់ សកម្មភាពរបស់អ៊ីស្រាអែលបានឆក់យក ជីវិតមនុស្សយ៉ាងហោចណាស់ ១.៣០០នាក់មកហើយ៕
ប្រែសម្រួល៖ស៊ុនលី
