បរទេស៖ យោងតាមការចេញផ្សាយរបស់ RT កងទ័ពអាកាសអ៊ីស្រាអែលបានអះអាងថា យន្តហោះចម្បាំងរបស់ខ្លួន បានទម្លាក់គ្រាប់បែកលើប្រទេសស៊ីរី ដោយកំណត់គោលដៅដែលរដ្ឋាភិបាលអ៊ីស្រាអែល ចាត់ទុកថាជាឃ្លាំងអាវុធរបស់ក្រុមហេសបូឡាក្នុងខេត្ត Homs និងជាបរិវេណស៊ើបការណ៍ នៅជិតក្រុងដាម៉ាសផងដែរនោះ។
អ្នកស្រុកបានរាយការណ៍ ពីការផ្ទុះនៅក្នុងទីប្រជុំជន Al-Qusayr កាលពីរសៀលថ្ងៃអង្គារ ដែលមានទីតាំងនៅជិត ព្រំដែនជាមួយប្រទេសលីបង់ និងភាគខាងត្បូងនៃទីក្រុង Homs ហើយកងកម្លាំងការពារអ៊ីស្រាអែល (IDF) បានអះអាងថា គោលដៅគឺជាឃ្លាំងអាវុធ និងគ្រាប់រំសេវរបស់ក្រុមហេសបូឡា។
នៅព្រឹកថ្ងៃដដែល កងកម្លាំងអ៊ីស្រាអែលហៅកាត់ថាIDF បានបញ្ជាក់ថា យន្តហោះរបស់អ៊ីស្រាអែល បានទម្លាក់គ្រាប់បែកនៅតំបន់ជុំវិញទីក្រុង Damascus តាំងតែពីល្ងាចថ្ងៃចន្ទ។
យោធាអ៊ីស្រាអែលបានអះអាងថាបានសម្លាប់ប្រធានប្រតិបត្តិការស៊ើបការណ៍សម្ងាត់របស់ក្រុមហេសបូឡាក្នុងប្រទេសស៊ីរី គឺលោក Mahmoud Mohammed Shaheen។
កន្លងមកលោកShaheen ត្រូវបានគេចោទប្រកាន់ថា បានដំណើរការសាខាស៊ើបការណ៍សម្ងាត់របស់ Hezbollah នៅក្នុងប្រទេសស៊ីរី ហើយបានសម្របសម្រួលជាមួយអ៊ីរ៉ង់ និងរដ្ឋាភិបាលនៅទីក្រុង Damascusផងដែរ ។
បើយោងតាមយោធាអ៊ីស្រាអែល ការកំណត់គោលដៅលើទិតាំង របស់ក្រុមហេសបូឡាក្នុងប្រទេសស៊ីរី បានចូលរួមចំណែកបន្ថែមទៀតដល់ប្រតិបត្តិការ IDF នៅលីបង់ ដោយធ្វើឲ្យខូចសមត្ថភាពស៊ើបការណ៍របស់ក្រុមហេសបូឡា ៕
ប្រែសម្រួល៖ ស៊ុន លី
