ឡុងដ៌ ៖ ប្រភពស្និទ្ធនឹងបញ្ហានេះបានឲ្យដឹងថា រដ្ឋាភិបាលអង់គ្លេស បានសម្រេចចិត្តបន្តកម្មវិធី អភិវឌ្ឍន៍យន្តហោះចម្បាំងរួមគ្នា ជាមួយជប៉ុន និងអ៊ីតាលី បន្ទាប់ពីការពិនិត្យឡើងវិញ លើការចំណាយលើវិស័យការពារជាតិ ចំពេលមានការរំពឹងទុក ដែលថា ផែនការនេះអាចត្រូវបានលុបចោល ។
ប្រភពបានឲ្យដឹងថា រដ្ឋាភិបាលការងារក្រោមនាយករដ្ឋមន្រ្តីលោក Keir Starmer ឥឡូវនេះបានចាត់ទុក ផែនការនេះថា ជាគម្រោងការពារដ៏សំខាន់ ដែលមានសារៈសំខាន់សម្រាប់ ទំនាក់ទំនងការទូតជាមួយប្រទេសជប៉ុន និងអ៊ីតាលី និងសម្រាប់ការបង្កើត ការងារថ្មីៗជាច្រើន ។
រដ្ឋាភិបាលអង់គ្លេស នឹងពិនិត្យឡើងវិញនូវយុទ្ធសាស្ត្រ ការពារជាតិរបស់ខ្លួន រហូតដល់ឆមាសទីមួយនៃឆ្នាំ២០២៥ ខណៈដែលខ្លួនក៏ចូលរួមផងដែរ ក្នុងការអភិវឌ្ឍនាវាមុជទឹកនុយក្លេអ៊ែរ សម្រាប់គម្រោង AUKUS ជាមួយសហរដ្ឋអាមេរិក និងអូស្ត្រាលី ក្តីបារម្ភបានកើតឡើង ចំពោះការចំណាយដ៏ច្រើន ដែលទាក់ទងនឹងការអភិវឌ្ឍន៍ យន្តហោះជំនាន់ក្រោយ។
ចាប់ពីឆ្នាំក្រោយ កម្មវិធីប្រយុទ្ធនឹងឈានចូលដំណាក់កាលថ្មី ដោយចាប់ផ្តើមជាមួយនឹងការ រចនាយន្តហោះទាំងស្រុង នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
យន្តហោះនេះត្រូវបានគេរំពឹងថា នឹងត្រូវដាក់ពង្រាយនៅឆ្នាំ២០៣៥ ហើយនឹងត្រូវបានបំពាក់ដោយបញ្ញាសិប្បនិម្មិត និង បច្ចេកវិជ្ជាបំបាំងកាយដ៏ទំនើប។
លោក Masami Oka អតីតអនុរដ្ឋមន្ត្រីការពារជាតិជប៉ុន ទទួលបន្ទុកកិច្ចការអន្តរជាតិ ត្រូវបានតែងតាំងឲ្យដឹកនាំអង្គការអន្តរជាតិ ដែលនឹងគ្រប់គ្រងគម្រោងនេះ ហៅថា Global Combat Air Program ៕
ប្រែសម្រួល ឈូក បូរ៉ា
