បរទេស៖ ក្នុងការចាប់ខ្លួនអ្នកលេង Tiktok ឈ្មោះ Mr.Pips ដែលមានឈ្មោះពិតថា Pho Duc Nam អាយុ ៣០ ឆ្នាំ រស់នៅក្នុងខេត្ត Ba Ria-Vung Tau គឺ អាជ្ញាធរបានរឹបអូស និងបង្កកទ្រព្យសម្បត្តិជាច្រើនដែលគិតជាទឹកប្រាក់ជាង ៥.២០០ ពាន់លានដុង។ ក្នុងនោះមានគណនីផ្ទាល់ខ្លួនចំនួន ៣១៦ ពាន់លានដុង , សៀវភៅសន្សំមានតម្លៃជាង ២០០ ពាន់លានដុង , សាច់ប្រាក់ ៦៩ ពាន់លានដុង , ២,៣ លានដុល្លារអាមេរិក, មាស SJC ៨៩០ ដុំ, មាសសុទ្ធ ២៤៦ គីឡូក្រាម, នាឡិកាម៉ាកល្បីៗ ៥៩ គ្រឿង និងអចលនទ្រព្យចំនួន ១២៥ ។ នេះជាករណីក្លែងបន្លំប្រាក់បរទេសធំបំផុតក្នុងប្រទេសវៀតណាម , នេះបើតាមប៉ូលិសក្រុងហាណូយ ។
យោងតាមសារព័ត៌មាន VN EXPRESS ចេញផ្សាយនៅថ្ងៃទី១២ ខែធ្នូ ឆ្នាំ២០២៤ បានឱ្យដឹងថា មានរថយន្តទំនើបៗ, រថយន្តស្ព័រ និងរថយន្តប្រណិតចំនួន ៣១ គ្រឿង រួមមាន ម៉ាក Porsche, Jaguar, Mercedes, Lexus, Rolls-Royce, Lamborghini, Ferrari, Nissan, Mazda, Subaru ដែលមានតម្លៃ រាប់រយពាន់លានដុង ដែលខ្លះកម្រមាននៅ ប្រទេសវៀតណាម និង ពិភពលោកដែលបានចុះបញ្ជីក្រោមឈ្មោះ ណាម និងសាច់ញាតិមួយចំនួន។ រថយន្តត្រូវបានទិញ តាមរបៀបផ្សេងៗគ្នា ខ្លះត្រូវបាននាំចូលថ្មីៗដោយអង្គភាពឯកជន ខ្លះត្រូវបានទិញមកវិញ ក្នុងគោលបំណងលាងលុយកខ្វក់ និងបង្កើតរូបភាពនៃជីវិតអ្នកមាន ដើម្បីទាក់ទាញការវិនិយោគហិរញ្ញវត្ថុ។
នៅលើបណ្តាញសង្គម លោក ណាម បានណែនាំខ្លួនឯងថាមានបទពិសោធន៍ ១០ឆ្នាំនៅក្នុងទីផ្សារវិនិយោគមាស និងភាគហ៊ុនអន្តរជាតិ ដើម្បីអញ្ជើញអ្នកទាំងអស់គ្នា ឱ្យចូលរួមជាមួយ។ ណាម តែងតែប្តេជ្ញាចិត្តក្នុងការ មានយុទ្ធសាស្ត្រឈ្នះៗ ដូច្នេះ “អ្នកណាដែលចូលរួមនឹងទទួលបានប្រាក់ចំណេញខ្ពស់”។
Mr Pips ឬ ណាម ក៏ជាស្ថាបនិក និងជាអ្នកគ្រប់គ្រងសហគមន៍ ដែលមានសមាជិកប្រហែល ២ម៉ឺន នាក់នៅលើ Telegram ដើម្បីចែករំលែកបទ ពិសោធន៍ជាមួយអ្នកវិនិយោគ។ TikToker រូបនេះក៏លក់វគ្គសិក្សា តាមអ៊ីនធឺណិត លើការវិភាគ បច្ចេកទេស និងចិត្តវិទ្យាទីផ្សារផងដែរ។
នៅលើ Tiktok ណាម មានអ្នកតាមដាន ឬ follower រាប់លាននាក់ ហើយត្រូវបានគេស្គាល់ថា ជាអ្នកជំនាញ លំដាប់ពិភពលោក ក្នុងការវិនិយោគហិរញ្ញវត្ថុ ។ នៅក្នុងវីដេអូរបស់គាត់ ណាម តែងតែចែករំលែកអំពី “ក្តីសុបិន” របស់គាត់ក្នុងការកសាង សហគមន៍វិនិយោគ និងហិរញ្ញវត្ថុ។
នៅលើហ្វេសប៊ុក ណាម ក៏តែងចែករំលែកអំពីសីលធម៌ និង«រូបមន្តដើម្បីក្លាយជាអ្នកមាន»។ គាត់តែងតែលេចមុខជាសេដ្ឋី មានរថយន្តទំនើបៗ លុយរាប់មិនអស់ ហើយតែងតែមានវត្តមាន នៅកន្លែងដ៏ប្រណិត៕
ប្រែសម្រួលៈ ណៃ តុលា
