នយោបាយ

គបមប្រកាសមិនគាំទ្រ ការផ្លាស់ប្តូរ តាមរយៈរូបភាពហិង្សា ពីព្រោះមិនមែនជាដំណើរការ នៅក្នុងសង្គមប្រជាធិបតេយ្យឡេីយ

ភ្នំពេញ​: គណបក្សប្រជាធិបតេយ្យមូលដ្ឋាន (គបម​)ប្រកាស​ មិនគាំទ្ររាល់ការផ្លាស់ប្តូរ-តាមរយៈរូបភាពហិង្សា-ពីព្រោះវាមិនមែនជាដំណើរការនៅក្នុងសង្គមប្រជាធិបតេយ្យ ដែលប្រជាពលរដ្ឋចង់បាន។ 

គបម​ប្រកាស​បែប​នេះ ​ស្រប​ពេល​ដែល​ទណ្ឌិត​ សម​រង្ស៊ី​ មេដឹកនាំ​ក្រុម​ប្រឆាំង​បន្ត​អំពាវនាវ ​ដល់ប្រជាពលរដ្ឋ និងកងកម្លាំងប្រដាប់អាវុធ បះបោរប្រឆាំង និងផ្ដួលរំលំរាជរដ្ឋាភិបាលស្របច្បាប់ នៅថ្ងៃទី៩វិច្ឆិកា​ខាងមុខ​។ 

គណបក្សប្រជាធិបតេយ្យមូលដ្ឋាន នៅតែមានការជឿជាក់ថា ការផ្លាស់ប្តូរ នៃការដឹកនាំបែបឯកបក្ស ទៅសេរីពហុបក្ស នៅតែអាចធ្វើបានតាមរយៈ នៃការបោះឆ្នោត ដោយសេរី និងយុត្តិធម៌ ដែលជាដំណើរដ៏ប្រសើរបំផុត ក្នុងសង្គមប្រជាធិបតេយ្យ។

យោង​តាម​គេហទំព័រ​ហ្វេសប៊ុក ​របស់​គបម​នៅរាត្រី​ថ្ងៃ​ទី​១ខែ​វិច្ឆិកា​នេះបានឲ្យដឹងបន្ថែមថា មួយវិញទៀតការផ្លាស់ប្តូរ ពីការដឹកនាំបែបឯកបក្សទៅ ពហុបក្ស នៅក្នុងសង្គមប្រជាធិបតេយ្យ គឺអាស្រ័យលើប្រជាពលរដ្ឋម្ចាស់ឆ្នោត ជាអ្នកសម្រេចចិត្ត។ បើពួកគាត់នាំគ្នាទៅបោះឆ្នោតយកឯកបក្ស នឹងបានឯកបក្ស តែបើពួកគាត់ទៅបោះឆ្នោតយកពហុបក្សនោះ នឹងបានពហុបក្ស។ 

ក្រោយការបោះឆ្នោត គណបក្សដែលទទួលបានសំឡេងភាគតិច ត្រូវផ្តល់តម្លៃឱ្យបក្ស ដែលទទួលបានសំឡេងភាគ ច្រើន ហើយគណបក្សទាំងពីរត្រូវចាប់ដៃគ្នា កសាងប្រទេសជាតិរួមគ្នា ដើម្បីវឌ្ឍនភាពសង្គមជាតិទាំងមូល។  

គណបក្សប្រជាធិបតេយ្យមូលដ្ឋាន គឺធ្វើនយោបាយ តាមគុណតម្លៃរបស់ខ្លួនមានសាមគ្គី យុត្តិធម៌ អហិង្សា៕

To Top