ភ្នំពេញ ៖ សមាជិករដ្ឋសភា ចំនួន១០៨រូប បានកំពុងពិភាក្សា លើសេចក្តីព្រាងច្បាប់ហិរញ្ញវត្ថុ សម្រាប់ការគ្រប់គ្រងឆ្នាំ២០២០ ដែលមាន៧ជំពូក និង១៥មាត្រា ក្នុងឱកាសសភា បើកសម័យប្រជុំពេញ អង្គនៅព្រឹកថ្ងៃទី២៦ ខែវិច្ឆិកា ឆ្នាំ២០១៩នេះ ។
សម័យប្រជុំរដ្ឋសភាលើកទី៣ នីតិកាលទី៦ រដ្ឋសភាប្រព្រឹត្ត ទៅក្រោមអធិបតីភាព សម្តេច ហេង សំរិន ប្រធានរដ្ឋសភា ។
លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថា សេចក្តីព្រាងច្បាប់នេះ ត្រូវបានរដ្ឋាភិបាល ផ្តល់អាទិភាពឲ្យក្រសួងចំនួន៣ សំខាន់ៗមាន ៖ ក្រសួងអប់រំ យុវជន និងកីឡា ក្រសួងការងារ និងបណ្តុះបណ្តាលវិជ្ជាជីវៈ និងក្រសួងសុខាភិបាល ។
លោកបន្តថា សេចក្តីព្រាងច្បាប់ ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២០ ឬហៅថា ច្បាប់ថវិកាជាតិឆ្នាំ២០២០ ត្រូវបានរាជរដ្ឋាភិបាល គ្រោងចំណាយចំនួន ៣៣ ៣៣៩ ៦៣៣ លានរៀល ស្មើប្រមាណ ៨១៩៦ លានដុល្លារត្រូវជា២៨,០១% នៃផលិតផលក្នុងស្រុកសរុប (ផ.ស.ស) គឺមានកំណើន ២២,៧% ធៀបនឹងច្បាប់ ថវិកាជាតិឆ្នាំ២០១៩ ។
ក្រសួងសេដ្ឋកិច្ចបង្ហាញថា សេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រង ឆ្នាំ២០២០ដែលគណៈរដ្ឋមន្ត្រី បានប្រជុំពិនិត្យ និងអនុម័តនេះ ត្រូវបានគ្រោង សម្រាប់ការ ដំឡើងបៀវត្សមូលដ្ឋាន ក្នុងអត្រា ៧,០% តាមតម្លៃឯកតាសន្ទស្សន៍ ២៥០០ រៀល ដោយអនុវត្តន៍ ចាប់ពីខែមករា ឆ្នាំ២០២០ ព្រមទាំងការដំឡើង ប្រាក់បំណាច់មុខងារ នឹងត្រូវអនុវត្ត ចាប់ពីខែមេសា ឆ្នាំ២០២០ ដោយផ្តល់បន្ថែម ៣០០០០ រៀល ជូនមន្ត្រីរាជការស៊ីវិល និងកងកម្លាំងប្រដាប់អាវុធគ្រប់ប្រភេទ ដែលមានប្រាក់បំណាច់មុខងារ ក្នុងកម្រិតក្រោម ៩៦០០០០រៀល និងចាប់ពីកម្រិត ៩៦០១០០រៀល ដល់ ១១១០០០០ រៀល នឹងផ្តល់បន្ថែមចំនួន ២០០០០រៀល។
ក្នុងនោះ ក៏មានការដំឡើងប្រាក់ឧបត្ថម្ភប្រចាំខែ សម្រាប់មន្ត្រីជាប់កិច្ចសន្យា ពី៦៥០០០០រៀល ទៅដល់៦៧០០០០រៀល ដោយអនុវត្តចាប់ពីខែមករា ដល់ខែធ្នូ ឆ្នាំ២០២០៕
