ព័ត៌មានជាតិ

អាវុធហត្ថរាជធានីភ្នំពេញ អំពាវនាវដល់មហាជន ឱ្យជួយសហការផ្តល់ព័ត៌មាន អំពីបទល្មើសគ្រប់ប្រភេទ ដល់សមត្ថកិច្ច ជាពិសេស ករណីចោរឆក់!

ភ្នំពេញ ៖ នៅព្រឹកថ្ងៃទី០៤ ខែធ្នូ ឆ្នាំ២០១៩ សមត្ថកិច្ចជំនាញ នៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូនជនសង្ស័យ ០២នាក់ ទៅតុលាការ ដើម្បីផ្តន្ទាទោសតាមច្បាប់ ក្រោមការចោទប្រកាន់ពីបទ លួចមានស្ថានទម្ងន់ទោស(ឆក់កាបូប)។

១/ ឈ្មោះ ចំរើន វាសនា ហៅខ្មៅ ភេទប្រុស អាយុ ២១ឆ្នាំ ត្រូវបានកម្លាំងល្បាតមូលដ្ឋានអាវុធហត្ថខណ្ឌដូនពេញ ឃាត់ខ្លួននៅចំណុច ផ្លូវ១៤៤ កែងផ្លូវនរោត្តម សង្កាត់ផ្សារកណ្តាល២ ខណ្ឌដូនពេញ រាជធានីភ្នំពេញ ២/ ឈ្មោះ មាស វាសនា ហៅង៉ោល ភេទប្រុស អាយុ ១៧ឆ្នាំ ត្រូវបានសមត្ថកិច្ចជំនាញ នៃការិយាល័យស្រាវជ្រាវ បទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ សហការជាមួយកម្លាំងមូលដ្ឋាន អាវុធហត្ថខណ្ឌព្រែកព្នៅ ឃាត់ខ្លួន នៅចំណុច ឃ្លាំងលើ ភូមិឡកំបោរ សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ ។

អាវុធហត្ថរាជធានីភ្នំពេញ បានឲ្យដឹងថា ជនសង្ស័យទាំង២នាក់ខាងលើ បានធ្វើសកម្មភាពឆក់ កាបូប ពីប្រជាពលរដ្ឋ ដែលកំពុងធ្វើដំណើរលើដងផ្លូវ បានសម្រេច នៅវេលាម៉ោង៣ទៀបភ្លឺ ថ្ងៃទី២៩ ខែវិច្ឆិកា ឆ្នាំ២០១៩ ប៉ុន្តែជនសង្ស័យម្នាក់ ត្រូវបានឃាត់ខ្លួនភ្លាមៗ បន្ទាប់ពីសកម្មភាពឆក់រួច និង ម្នាក់ទៀតត្រូវបានឃាត់ខ្លួន ក្នុងថ្ងៃបន្ទាប់ តាមរយៈការសហការគ្នា របស់សមត្ថកិច្ច ប្រឹងប្រែងស្រាវជ្រាវ តាមដាន និងពួនស្ទាក់ អស់រយៈពេល១យប់១ថ្ងៃ ។ ជនសង្ស័យទាំង ០២នាក់ ខាងលើ បានសារភាព ចំពោះមុខសមត្ថកិច្ចអាវុធហត្ថឲ្យដឹងថា កន្លងមករូបគេ ធ្លាប់ប្រើប្រាស់គ្រឿងញៀន ជាប្រចាំថ្ងៃ រយៈពេល ០១ឆ្នាំមកហើយ។

ទន្ទឹមជាមួយគ្នានេះផងដែរ សមត្ថកិច្ចជំនាញ របស់កងរាជអាវុធហត្ថរាជធានីភ្នំពេញ បានបង្ហើបឲ្យដឹងថា រាល់ការស្រាវជ្រាវ និងបង្ក្រាបបទល្មើសបានសម្រេច និងទាន់ពេលវេលា គឺអាស្រ័យលើព័ត៌មានជាសំខាន់ ដូច្នេះសមត្ថកិច្ចសូមអំពាវនាវដល់មហាជន មេត្តាជួយផ្តល់ពត៌មាន និងដាក់ពាក្យបណ្តឹង គ្រប់ពេលវេលា ដែលមានបទល្មើសកើតឡើង ដើម្បីជាទុនដល់សមត្ថកិច្ច ក្នុងការស្រាវជ្រាវ និងបង្ក្រាប ព្រោះសមត្ថកិច្ចមិនអាចដឹង ហេតុការណ៍គ្រប់រឿងគ្រប់ពេលបានទេ បើគ្មានការសហការពីមហាជន ក៏ដូចជាជនរងគ្រោះនោះ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top