ភ្នំពេញ៖ លោកស្រី Tina Redshaw ឯកអគ្គរាជទូតចក្រភព អង់គ្លេស ប្រចាំកម្ពុជា បានសាទរចំពោះជំនួបរវាង ឥស្សរជនខ្មែរទាំងពីរ គឺសម្តេចតេជោ ហ៊ុន សែន និងលោក កឹម សុខា នៅថ្ងៃទី៥ ខែឧសភា និងយល់ថាជាជំហានវិជ្ជមាន ដំបូងឆ្ពោះទៅមុខ។
ការលើកឡើងរបស់លោក ស្រីធ្វើឡើងក្នុងជំនួបរវាង លោក កឹម សុខា និងលោកស្រីនៅរសៀលថ្ងៃ ទី១ ខែមិថុនា ឆ្នាំ២០២០។ នេះបើយោងតាមការបង្ហាញ នៅក្នុងហ្វេសប៊ុក លោក មុត ចន្ថា មនុស្សជំនិតលោក កឹម សុខា។
ហ្វេសប៊ុកលោក មុត ចន្ថា បន្តថា “ក្នុងជំនួបនោះ យើងបានសំណេះសំណាលគ្នាយ៉ាងស្និទ្ធស្នាលអស់រយៈពេលជាង ១ម៉ោង ដែលក្នុងនោះ លោកស្រីឯកអគ្គរាជទូត បានសម្តែងនូវការសាទរចំពោះជំនួបរវាងឥស្សរជនខ្មែរទាំងពីរ គឺសម្តេចអគ្គមហាសេនាបតីតេជោ ហ៊ុន សែន និង ឯកឧត្តម កឹម សុខា នៅថ្ងៃទី៥ ខែឧសភា និងយល់ថាជាជំហានវិជ្ជមានដំបូងឆ្ពោះទៅមុខ”។
ក្រៅពីនេះ ភាគីទាំងពីរបានចាប់អារម្មណ៍ខ្លាំង និងផ្លាស់ប្តូរយោបល់គ្នាអំពីបញ្ហាកូវីដ-១៩ សង្គម សេដ្ឋកិច្ច និងជាពិសេសបញ្ហាជីវភាពរបស់ប្រជាពលរដ្ឋខ្មែរ ក្នុងស្ថានភាពនេះ និងផលវិបាកដែលរួមគ្នាដោះស្រាយទៅអនាគត៕
