ភ្នំពេញ៖ លោកស្រី Manika Jain ឯកអគ្គរដ្ឋទូតឥណ្ឌា ចប់អាណត្តិប្រចាំកម្ពុជា បានថ្លែងកោតសរសើរ រាជរដ្ឋាភិបាលកម្ពុជា ដែលទប់ស្កាត់ ជំងឺកូវីដ១៩ បានយ៉ាងល្អប្រសើរ ។
ថ្លែងប្រាប់ក្រុមអ្នកសារព័ត៌មាន ក្រោយជំនួបរវាងលោក ប្រាក់ សុខុន ឧបនាយករដ្ឋមន្ដ្រី រដ្ឋមន្ដ្រីក្រសួងការបរទេសខ្មែរ និងលោកស្រីឯកអគ្គរដ្ឋទូតឥណ្ឌា នៅថ្ងៃទី១៥ កញ្ញានេះ លោក កុយ គួង អ្នកនាំពាក្យក្រសួងការបរទេសខ្មែរ បានមានប្រសាសន៍ថា លោកស្រីទូតបានថ្លែងថា បើទោះបីបច្ចុប្បន្នបណ្តាប្រទេស លើពិភពកំពុងជួបប្រទះបញ្ហា សុខភាពសាធារណៈបណ្តាលមកពីការរីករាលដាល នៃជំងឺកូវីដ១៩ក៏ដោយ ប៉ុន្ដែលោកស្រីមើលឃើញថា កម្ពុជាបានយកចិត្តទុកដាក់ខ្ពស់ ចំពោះការការពារ និងទប់ស្កាត់បានយ៉ាង មានប្រសិទ្ធភាពខ្ពស់។
លោក កុយ គួង បន្ថែមថា ក្នុងជំនួបនេះដែរលោកឧបនាយករដ្ឋមន្ត្រី ប្រាក់ សុខុន និងលោកស្រី Manika Jain ក៏បានបង្ហាញពីឆន្ទៈចង់ឃើញ មានជើងហោះហើរត្រង់ កម្ពុជា-ឥណ្ឌា ដើម្បីជួយឲ្យវិស័យទេសចរណ៍ វាងប្រទេសទាំងពីរ កាន់តែមានការរីកចម្រើន ថែមមួយកម្រិតទៀត ។
លោក កុយ គួង បញ្ជាក់ថា «វិស័យសុខាភិបាលលោកជំទាវ ក៏បានកោតសរសើរ វាយតម្លៃខ្ពស់ចំពោះរដ្ឋាភិបាលកម្ពុជាយើងលើការទប់ស្កាត់ជំងឺកូវីដ១៩នេះ ដែលធ្វើឱ្យមន្ដ្រីស្ថានទូត និងប្រជាជនឥណ្ឌាដែលរស់នៅកម្ពុជា មានសុវត្ថិភាពក្នុងការធ្វើដំណើរ ក្នុងការរស់នៅប្រកបមុខរបរ នៅក្នុងប្រទេសយើង ។ ហើយពាក់ព័ន្ធនិង វិស័យសុខាភិបាលហ្នឹងទៀតដែរ លោកជំទាវក៏បានបញ្ជាក់ ដែរ រិះរកហៅថាបង្កើតវ៉ាក់សាំង ទប់ស្កាត់ជំងឺកូវីដ១៩នេះ ហើយប្រសិនបើវ៉ាក់សាំងនេះ បានកើតមានឡើងមែន រកឃើញមែនគឺថាអាចនិងផ្តល់ទៅដល់ប្រទេសកំពុងអភិវឌ្ឍន៍ផ្សេងៗទៀតផងដែរ»។
ជាការឆ្លើយតបលោកឧបនាយករដ្ឋមន្ដ្រី ប្រាក់ សុខុន ចូលរួមរំលែកទុក្ខ ចំពោះរដ្ឋាភិបាលឥណ្ឌា និងប្រជាជនឥណ្ឌា ដែលជួបគ្រោះទឹកជំនន់ និងវិបត្តិជំងឺកូវីដ១៩នេះ។ លោកឧបនាយករដ្ឋមន្ដ្រី ក៏បានថ្លែងអំណរគុណដល់ រដ្ឋាភិបាលឥណ្ឌាដែលតែងតែ ជួយដល់កម្ពុជា ពិសេសការផ្តល់ជំនួយឥតសំណង កម្ចីសម្បទាន និងអាហារូបករណ៍ដល់សិស្សនិស្សិត ចំពោះការសិក្សារយៈពេលវែង និងខ្លី ៕
