ព័ត៌មានជាតិ

ក្មេងស្រីក្រមុំម្នាក់ រអិលជើងធ្លាក់ទឹក លង់ស្លាប់ នៅជិតផ្សារភូពុយ ខេត្តពោធិ៍សាត់

ភ្នំពេញ ៖ នារីក្រមុំរូបស្រស់ម្នាក់ បានងូតទឹកលេងជាមួយ មិត្តភ័ក្កិហើយភ្លាត់ស្នៀត រអិលជើងធ្លាក់ទឹកលិចបាត់ កាលពីល្ងាចថ្ងៃទី១១ខែតុលាឆ្នាំ២០២០ លុះវេលា ម៉ោង៩និង២៥នាទីយប់ ទើបរកសាកសពឃើញ។

ករណីនេះបានកើតឡើង នៅជិតផ្សារភូពុយស្ថិតក្នុងភូមិស្ថានីយ៍ សង្កាត់ស្វាយអាត់ ក្រុងពោធិ៍សាត់ ។ នេះបើតាមការបង្ហោះក្នុងហ្វេសប៊ុកលោក ខៀវ កាញារីទ្ធ រដ្ឋមន្រ្តីក្រសួងព័ត៌មាននៅថ្ងៃ១២ តុលា ។

សមត្ថកិច្ចឲ្យដឹងថា នារីរងគ្រោះឈ្មោះ សុង រក្សា អាយុ២១ឆ្នាំ នៅភូមិបន្ទាយដី សង្កាត់បន្ទាយដី ក្រុងពោធិ៍សាត់ អតីតនិស្សិតរៀនផ្នែកអគ្គិសនី នៅវិទ្យាស្ថានពហុបច្ចេកទេសពោធិ៍សាត់ ទើបតែផ្លាស់មករៀនជំនាញ គណនេយ្យវិញ នៅសកលវិទ្យាល័យអង្គរខេមរា សាខាខេត្តពោធិ៍សាត់។

ប៉ុន្មានថ្ងៃនេះទឹកជំនន់ បានជន់លិចតំបន់មួយចំនួន ក្នុងទីរួមខេត្តពោធិ៍សាត់។ នៅល្ងាចថ្ងៃទី១១នោះនារីរងគ្រោះបានទៅលេងទឹកជាមួយមិត្តភ័ក្កិនៅភូមិស្ថានីយ៍ សង្កាត់ ស្វាយអាត់ ម្ដុំខាងលិចផ្សារភូពុយ ។ ខណៈកំពុងលេងទឹកសប្បាយរីករាយជាមួយមិត្តភ័ក្កិនោះ ស្រាប់តែចៃដន្យរអិលជើងធ្លាក់ចូលទឹក លូលិចបាត់តែម្ដង។

ភ្លាមៗនោះមានការផ្អើលឆោឡោ ដល់អ្នកស្រុកនិងក្រុម យុវជន នាំគ្នាចុះរាវរកគ្រប់ទីកន្លែង តែមិនឃើញទាល់តែសោះ លុះវេលាម៉ោង០៩និង២៥នាទីយប់ទើបរកឃើញ ប៉ុន្តែនាងបានស្លាប់បាត់ទៅហើយ។

សពនារីរងគ្រោះសមត្ថកិច្ចបានប្រគល់ជូនឪពុកម្ដាយ យកទៅធ្វើបុណ្យនៅវត្តបន្ទាយដី សង្កាត់បន្ទាយដី ក្រុងពោធិ៍សាត់ តាមប្រពៃណី៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top