ព័ត៌មានជាតិ

ជាង១ខែ ម្ចាស់យានយន្ត ឯកជន ស្លាកលេខ ខ.ម និង ន.ប ជាង៥រយគ្រឿង ក្នុងចំណោម ១ម៉ឺនគ្រឿង មកបង់ពន្ធ

ភ្នំពេញ ៖ បន្ទាប់ពីរាជរដ្ឋាភិបាល បានប្រកាសឲ្យម្ចាស់ យានយន្តឯកជន ជ្រកក្រោមផ្លាកលេខ ក្រសួងស្ថាប័នរដ្ឋ ជាពិសេស ផ្លាកលេខ ខ.ម និង ន.ប បំពេញកាតព្វកិច្ចបង់ពន្ធ និងអាករនាំចូលស្រប តាមច្បាប់ និងបទប្បញ្ញត្តិស្តីពី គយ តាមសំណើ របស់ក្រសួង សេដ្ឋកិច្ច និងហិរញ្ញវត្ថុ ដែលបានចាប់ផ្តើម អនុវត្តពីថ្ងៃទី១០ កញ្ញា មកទល់បច្ចុប្បន្ន មានម្ចាស់ យានយន្តចំនួន៥៤២គ្រឿង ក្នុងចំណោមជាង១ម៉ឺន គ្រឿង បានចូលមកបង់ពន្ធ ដែលស្មើនឹងថវិកា ៧,៣លានដុល្លារ តាមរយៈនាយកដ្ឋានគយ និងរដ្ឋាករកម្ពុជា ។

តាមការបញ្ជាក់ របស់លោក គុណ ញឹម រដ្ឋមន្រ្តីប្រតិភូអមនាយករដ្ឋមន្ត្រី អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច ក្នុងសន្និសីទសារព័ត៌មានស្តីពី វឌ្ឍនភាព នៃការអនុវត្តការប្រមូលពន្ធលើយានយន្ត គ្មានពន្ធ និងអាករនាំចូល ដែលមានស្រាប់ក្នុងប្រទេស នាថ្ងៃទី២៧ ខែតុលា ឆ្នាំ២០២១ តាមរយៈប្រពន្ធ Zoom បានឲ្យដឹងថា មានរថយន្តសរុប៥៤២គ្រឿង បានចូលមកបង់ពន្ធ ក្នុងនោះ មានរថយន្តចង្កូតឆ្វេង៣៥២គ្រឿង ស្មើនឹងថវិកា ៥.៨លានដុល្លារ និងរថយន្តចង្កូតស្តាំ បានមកកក់ប្រាក់សម្រាប់ទុក ពេលធ្វើការកែចង្កូត (ពីស្តាំមកឆ្វេង) ចំនួន ១៩០គ្រឿង គិតជាថវិកា ១.៥លានដុល្លារ ។ សរុបថវិកាដែលអគ្គនាយកដ្ឋានគយ និងរដ្ឋាករកម្ពុជា ប្រមូលបានចំនួន ៧,៣លានដុល្លារអាមេរិក គិតត្រឹមថ្ងៃទី២៦តុលា ។

លោក គុណ ញឹម លើកឡើងទៀតថា “មែនទែនទៅ មានការវាយតម្លៃ ប៉ានស្មានតែប៉ុណ្ណោះទេ ព្រោះការកាន់កាប់រថយន្តគ្មានពន្ធនេះ វានៅរាយប៉ាយ នៅទូទាំងប្រទេស ។ ចឹងហើយខ្ញុំធ្លាប់បានជម្រាបហើយថា ចំនួនរថយន្តគ្មានពន្ធ ដែលកំពុងប្រើប្រាស់ នៅក្នុងប្រទេសយើង ទាំងឆ្វេង ស្តាំ មានខ្ទង់ក្នុងរង្វង់ ១ម៉ឺនគ្រឿង” ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×