ភ្នំពេញ ៖ ក្នុងឱកាសចូលឆ្នាំថ្មី ឆ្នាំ២០២១ នាពេលខាងមុខនេះ លោក ម៉ាសាហ៊ីរ៉ូ មិកាមិ ឯកអគ្គរាជទូតជប៉ុន ប្រចាំកម្ពុជា មានក្ដីសង្ឃឹមថា នឹងអាចទស្សនាកន្លែងជាច្រើនទៀត និងជួបប្រជាជនកម្ពុជា ហើយជូនពរប្រជាជនកម្ពុជា ជួបតែសុភមង្គល នាឱកាសឆ្នាំថ្មី។
តាមរយៈវិដេអូឃ្លីប បង្ហោះនៅលើហ្វេសប៊ុករបស់ស្ថានទូតជប៉ុន ប្រចាំកម្ពុជា នារសៀលថ្ងៃទី២៥ ខែធ្នូ ឆ្នាំ២០២០នេះ លោក ម៉ាសាហ៊ីរ៉ូ មិកាមិ បានឲ្យដឹងថា ទោះបីមានវិបត្តិកូវីដ-១៩ក៏ដោយ លោកអាចទស្សនានៅ ខេត្តសៀមរាប បន្ទាយមានជ័យ កំពង់ធំ ព្រះសីហនុ ព្រះវិហារ ស្វាយរៀង និងខេត្តមួយចំនួនទៀត ជាពិសេសបានជួបប្រជាជនកម្ពុជានៅទីនោះផងដែរ។
លោកបញ្ជាក់ថា «ខ្ញុំសង្ឃឹមថា ខ្ញុំអាចទស្សនាកន្លែងជាច្រើនទៀត និងជួបប្រជាជនកម្ពុជា កាន់តែច្រើននៅឆ្នាំក្រោយ ផងដែរ។ខ្ញុំសូមជូនពរ លោក-លោកស្រី ក្មួយៗ ជួបតែសុភមង្គល នាឱកាសឆ្នាំ២០២១ ដែលខិតចូលមកដល់នេះ សូមអរគុណ! »។
ជាងនេះទៅទៀត លោកទូត ក៏មានសុភាសិទ្ធមួយថា «ភាពងងឹតពេលរាត្រី និងបញ្ចប់ដោយព្រះអាទិត្យរះឡើង , បន្ទាប់ពីរដូវរងារ គឺរដូវផ្ការីក មានន័យថា គ្មានរឿងអាក្រក់ៗណាដែលបន្ដរហូតនោះទេ»៕
