វ៉ាស៊ីនតោន៖ អាជ្ញាធរសុខាភិបាលអាមេរិក បានឲ្យដឹងថា ពួកគេបានផ្តល់ការយល់ព្រមពេញលេញ ចំពោះវ៉ាក់សាំងបង្កាជំងឺកូវីដ-១៩ របស់ក្រុមហ៊ុន Pfizer Inc ដែលធ្វើឱ្យវាក្លាយជាវ៉ាក់សាំងដំបូងបង្អស់នៅក្នុងប្រទេស ដែលមានវ៉ាក់សាំងចំនួន ៣ ត្រូវបានគ្រប់គ្រងក្រោមការប្រើប្រាស់គ្រាអាសន្ន ដើម្បីការពារការរីករាលដាលនៃវីរុសកូរ៉ូណាប្រភេទថ្មី។
យោងតាមរដ្ឋបាលចំណីអាហារ និងឱសថអាមេរិក បានឱ្យដឹងថា ការអនុម័តវ៉ាក់សាំង ដែលបង្កើតឡើងដោយ Pfizer និងដៃគូអាឡឺម៉ង់ BioNTech SE ត្រូវបានផ្តល់ឱ្យ សម្រាប់មនុស្សដែលមានអាយុចាប់ពី ១៦ ឆ្នាំឡើងទៅ។ ចំពោះអ្នកដែលមានអាយុពី ១២ ទៅ ១៥ ឆ្នាំអាចទទួលបានការចាក់ថ្នាំបង្ការរោគក្រោមការអនុញ្ញាតឱ្យប្រើគ្រាអាសន្ន ដែលមានសុពលភាពរួចហើយ។
រដ្ឋបាលរបស់ប្រធានាធិបតីលោក ចូ បៃដិន រំពឹងថាជនជាតិអាមេរិកកាន់តែច្រើន នឹងទទួលបានវ៉ាក់សាំងការពារជំងឺកូវីដ -១៩ ដែលឥឡូវនេះបានទទួលការយល់ព្រមពេញលេញពីនិយតករព្រោះផ្នែកខ្លះនៃប្រទេស បានប្រឆាំងនឹងការចាក់ថ្នាំបង្ការរោគ ទោះបីជាមានយុទ្ធនាការរីករាលដាល ដើម្បីលើកកម្ពស់ការចាក់ថ្នាំបង្ការរោគយ៉ាងណាក៏ដោយ។
ការប្រកាសរបស់ FDA បានកើតឡើងនៅពេលដែលសហរដ្ឋអាមេរិក កំពុងមើលឃើញពីការកើនឡើងយ៉ាងខ្លាំងនៃការឆ្លងជំងឺកូវីដ-១៩ ជាមួយនឹងការប្រែប្រួលយ៉ាងខ្លាំងនៃទម្រង់ឆ្លងថ្មី Delta ដែលរីករាលដាលពាសពេញប្រទេស។
រដ្ឋាភិបាល មានឆន្ទៈក្នុងការជំរុញអត្រាចាក់វ៉ាក់សាំង នៅពេលមនុស្សមួយចំនួនតវ៉ាប្រឆាំងនឹងការពាក់ម៉ាស់ជាចាំបាច់នៅតាមសាលារៀន និងកន្លែងផ្សេងទៀត។យោងតាមទិន្នន័យចុងក្រោយពីមជ្ឈមណ្ឌលត្រួតពិនិត្យ និងបង្ការជំងឺ ប្រជាជនអាមេរិកចំនួន ៦០,៧ ភាគរយបានទទួលវ៉ាក់សាំងការពារជំងឺកូវីដ-១៩ យ៉ាងតិចមួយដូស។
វ៉ាក់សាំង Pfizer ត្រូវបានអនុម័តឱ្យប្រើប្រាស់ជាបន្ទាន់កាលពីខែធ្នូ ឆ្នាំមុន។ វ៉ាក់សាំងការពារមេរោគកូរ៉ូណាពីរផ្សេងទៀត ដែលមាននៅក្នុងប្រទេស គឺមួយត្រូវបានបង្កើតឡើង ដោយក្រុមហ៊ុន Moderna Inc និងមួយទៀតដោយក្រុមហ៊ុន Johnson & Johnson ៕
ដោយ ឈូក បូរ៉ា
