រីយ៉ូ៖ នាយកដ្ឋានពន្លត់អគ្គីភ័យក្នុងតំបន់បានប្រកាសឲ្យដឹងថា ចំនួនអ្នកស្លាប់បានកើនឡើងដល់ ១៧៦នាក់ដោយសារភ្លៀងធ្លាក់ខ្លាំង ដែលបណ្តាលឱ្យមានការបាក់ដី និងទឹកជំនន់កាលពីសប្តាហ៍មុននៅក្នុងក្រុង Petropolis ក្នុងរដ្ឋរីយ៉ូ ប្រទេសប្រេស៊ីល។
ក្រសួងការពារជនស៊ីវិលបានឲ្យដឹងថា ចំនួនអ្នកបាត់ខ្លួនមានចំនួន ១៩១ នាក់ ដោយមានមនុស្ស ២៤ នាក់ត្រូវបានជួយសង្គ្រោះចាប់តាំងពីថ្ងៃអង្គារ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ការប៉ុនប៉ងស្វែងរកអ្នករស់រានមានជីវិតនៅក្រោមភ្នំនៃភក់ ដែលបានហូរកាត់សង្កាត់ទីប្រជុំជនកាលពីថ្ងៃអង្គារត្រូវបានផ្អាកជាបណ្តោះអាសន្ននៅថ្ងៃសៅរ៍ ដោយសារតែភ្លៀងកាន់តែច្រើន និងហានិភ័យនៃការបាក់ដីបន្ថែមទៀត។
ប្រធានាធិបតីប្រេស៊ីលលោក Jair Bolsonaro បានធ្វើដំណើរតាមយន្ដហោះពីលើតំបន់រងគ្រោះកាលពីថ្ងៃសុក្រ ហើយបានពណ៌នាអំពីអ្វីដែលលោកបានឃើញថា ដូចជា “ទិដ្ឋភាពសង្រ្គាម”។
កូនភ្នំជាច្រើនបានដួលរលំអំឡុងពេលមានភ្លៀងធ្លាក់ខ្លាំង ដោយបាននាំយកផ្ទះសម្បែង និងយានជំនិះចេញទៅឆ្ងាយ ខណៈដែលអ្នកស្រុកបន្តជីកដីភក់ ដើម្បីស្វែងរកមនុស្សជាទីស្រលាញ់របស់ពួកគេដែលបាត់ខ្លួន៕ដោយ ឈូក បូរ៉ា
