វ៉ាស៊ីនតោន៖ ប្រធានាធិបតីសហរដ្ឋអាមេរិក លោក ចូ បៃដិន កាលពីថ្ងៃព្រហស្បតិ៍ បានចុះហត្ថលេខាលើច្បាប់ចំណាយ ១,៧ ពាន់ពាន់លានដុល្លារ សម្រាប់រដ្ឋាភិបាលសហព័ន្ធ ខណៈប្រទេសនេះ កំពុងប្រយុទ្ធប្រឆាំងនឹងអតិផរណា។
ច្បាប់នេះនឹងធ្វើឱ្យរដ្ឋាភិបាល សហព័ន្ធ ដំណើរការរហូតដល់ចុងឆ្នាំ ថវិកា សហព័ន្ធ ក្នុងខែកញ្ញា ឆ្នាំ២០២៣ ហើយជៀសវាងការបិទមួយផ្នែក មុនដំណាច់ឆ្នាំ២០២២ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
កញ្ចប់ចំណាយដ៏ធំសម្រាប់ឆ្នាំសារពើពន្ធ ២០២៣ រួមមាន ៧៧២,៥ពាន់លានដុល្លារសម្រាប់ការមិនការពារ កម្មវិធីក្នុងស្រុក និង ៨៥៨ ពាន់លានដុល្លារនៅក្នុងមូលនិធិការពារជាតិ។ វាក៏ផ្តល់ថវិកាសង្គ្រោះបន្ទាន់ប្រហែល ៤៥ ពាន់លានដុល្លារសម្រាប់អ៊ុយក្រែន ចំពេលមានជម្លោះ ដែលកំពុងបន្តជាមួយរុស្ស៊ី។
សមាជិកសភាអាមេរិករាប់រយនាក់ ដែលភាគច្រើនលើសលប់ មកពីគណបក្សសាធារណរដ្ឋ បានប្រឆាំងច្បាប់ ដែលដំណើរការជាង ៤០០០ ទំព័រ ដោយមានការព្រមានជាច្រើនថា វាអាចបញ្ឆេះអតិផរណានៅក្នុងប្រទេស។
អត្រាអតិផរណាប្រចាំឆ្នាំសម្រាប់សហរដ្ឋអាមេរិកគឺ ៧,១ ភាគរយសម្រាប់រយៈពេល ១២ខែ ដែលបានបញ្ចប់ក្នុងខែវិច្ឆិកា ឆ្នាំ២០២២ នេះបើយោងតាមទិន្នន័យ របស់ក្រសួងការងារសហរដ្ឋអាមេរិក ដែលបានចេញផ្សាយកាលពីដើមខែនេះ៕
ប្រែសម្រួល ឈូក បូរ៉ា
