ភ្នំពេញ៖ ថ្លែងចំពោះមុខ ប្រធានាធិបតីម៉ាល់ឌីវ លោក មហាម៉េត អ៊ីប្រាហ៊ីម សាឡេះ, សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា បានបង្ហាញក្តីសង្ឃឹមថា អង្កររបស់កម្ពុជា នាំចូលមកប្រទេសម៉ាល់ឌីវនេះ នឹងទទួលបានការពេញនិយមពីប្រជាជន និងអ្នកទេសចរណ៍នៅពេញម៉ាល់ឌីវ ព្រោះ អង្ករកម្ពុជា ជាប់ចំណាត់ថ្នាក់លេខ១ លើពិភពលោកចំនួន ៥ឆ្នាំ រួចមកហើយ។
នាឱកាសអញ្ជើញធ្វើសន្និសីទសារព័ត៌មាន រួមពីវិមានប្រធានាធិបតីម៉ាល់ឌីវ នៅថ្ងៃទី១៦ ខែមករា ឆ្នាំ២០២៣ សម្ដេចតេជោ ហ៊ុន សែន បានថ្លែងឱ្យដឹងថា កម្ពុជា-ម៉ាល់ឌីវ នឹងមានលទ្ធភាព ដើម្បីពង្រឹងទំហំពាណិជ្ជកម្មរវាងប្រទេសទាំងពីរ ផងដែរ។
សម្ដេចតេជោ បញ្ជាក់ថា «យើងពិតជាមានលទ្ធភាព ដើម្បីពង្រឹងទំហំពាណិជ្ជកម្មរវាងប្រទេសទាំងពីរ ដោយសារតែកម្ពុជាមាននូវ ទិន្ន័យនាំចូលមកម៉ាល់ឌីវ ដូចជា៖ អង្ករ និងវិស័យកសិកម្មដទៃទៀត ដែលមិនមែនគ្រាន់តែ សម្រាប់ប្រជាជនម៉ាល់ឌីវ នោះទេ ប៉ុន្ដែសម្រាប់វិស័យទេសចរណ៍ ដែលមកទស្សនកិច្ចនៅម៉ាល់ឌីវ ដោយសារអង្ករកម្ពុជា ស្ថិតជាអង្ករដែលជាប់លេខ១ លើពិភពលោកចំនួន ៥ដង ហើយកំពុងស្ថិតនៅ ជាប់ចំណាត់ថ្នាក់លេខ១ នៅឡើយ។ សង្ឃឹមថា អង្ករនេះ នឹងទទួលបាននូវការពេញនិយម សម្រាប់ប្រជាជនម៉ាល់ឌីវផង និងសម្រាប់អ្នកទេសចរណ៍ ដែលមកទស្សនកិច្ចនៅទីនេះ»។
លើសពីនេះ សម្ដេច នាយករដ្ឋមន្ដ្រី ក៏បានលើកឡើងថា កម្ពុជា ក៏នៅមានស្វាយចន្ទីរ ចេក ឬក៏ផ្នែកដទៃទៀត ដែលអាចបម្រើដល់វិស័យទេសចរណ៍ ដែលពួកគេមកទទួលទាននៅម៉ាល់ឌីវ ហើយអាចនាំចេញពីកម្ពុជាមកបានផងដែរ។ សម្ដេច បន្ដថា កម្ពុជា នៅមានសម្លៀកបំពាក់ ដែលម៉ាល់ឌីវ អាចបញ្ជាទិញពីកម្ពុជា ៕
