ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានចាត់ទុកក្រុមជនអាក្រក់ ដែលកំពុងរស់នៅក្រៅប្រទេសថា គ្មានសារជាតិជាមនុស្ស ។ ការចាត់ទុករបសសម្តេចនេះ ក្រោយពីពួកគេបានបំភ្លៃព័ត៌មានថា «សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន កំពុងមានជំងឺជាទម្ងន់»។
ការលើកឡើងរបស់ សម្ដេចតេជោបែបនេះ ក្រោយពីក្រុមប្រឆាំងជ្រុលនិយម បានលាបពណ៌ជាបន្តបន្ទាប់ មកលើក្រុមគ្រួសារសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ខណៈក្រុមគ្រួសារ សម្ដេចកិត្តិព្រឹទ្ធបណ្ឌិត កំពុងកាន់ទុក្ខចំពោះមរណភាព របស់លោកស្រី ប៊ុន សុថាដែលជាប្អូនស្រីពៅ របស់សម្ដេចកិត្តិព្រឹទ្ធបណ្ឌិត។
តាមរយៈគេហទំព័រហ្វេសប៊ុកនារាត្រីថ្ងៃទី៥ ខែកុម្ភៈ ឆ្នាំ២០២៣ សម្ដេចតេជោបានផ្ញើសារ បកត្រឡប់ទៅវិញថា “មុននេះបន្តិច(យប់មិញ) ក្រុមអាក្រក់នៅក្រៅប្រទេសថា ភរិយាខ្ញុំ កំពុងមានជំងឺជាទម្ងន់ ក្នុងពេលដែលភរិយាខ្ញុំ មិនបានឃ្លាតឆ្ងាយពីប្អូនស្រីតាំងពីមុន ចែកឋានរហូតមកនៅក្នុងក្តាមឈូស»។
សម្ដេចតេជោបន្ដដាស់សតិពួកគេទៀតថា «ខ្ញុំចង់ប្រាប់ទៅជនអាក្រក់ថា បើមេរបស់អ្នកអាក្រក់ សូមអ្នករក្សាខ្លួនជាមនុស្ស និងខិតខំរក្សាសុខភាពរបស់ អ្នកជាជាងមករករឿងគ្រួសារខ្ញុំ”។
សម្តេចនាយករដ្ឋមន្រ្តីថា ពួកនេះ ពិតជាអាក្រក់កែមិនបានទាំងមេ ទាំងកូន “ដែលគ្មានសារជាតិជាមនុស្សសោះ»។
ក្នុងឱកាសនេះ សម្តេចតេជោក៏បានរំលឹកពីបងប្អូនបង្កើត របស់សម្តេចកិត្តិព្រឹទ្ធិបណ្ឌិតថា សម្តេចកិត្តិព្រឹទ្ធិបណ្ឌិត មានបងប្អូនបង្កើត៥នាក់ ក្នុងនោះស្រី៣នាក់ និងប្រុស២នាក់។ ដោយបងប្រុសទី៣ ត្រូវបានប៉ុលពតសម្លាប់ ។
សូមបញ្ជាក់ថា លោកស្រី ប៊ុន សុថា ហៅ ប៊ុន សាមហ៊ីង ត្រូវជាប្អូនស្រីពៅបង្កើតរបស់ សម្តេចកិត្តិព្រឹទ្ធិបណ្ឌិត បានទទួលមរណភាព នាថ្ងៃទី៣ ខែកុម្ភៈ ឆ្នាំ២០២៣ ក្នុងជន្មាយុ៦៧ឆ្នាំ ដោយរោគាពាធ ៕
