ម៉ូស្គូ៖ អ្នកនាំពាក្យវិមានក្រឹមឡាំង លោក Dmitry Peskov បានប្រាប់កាសែត Sputnik កាលពីថ្ងៃអង្គារឲ្យដឹងថា ទីក្រុងមូស្គូ បានត្រៀមខ្លួនជាស្រេច ដើម្បីត្រលប់ទៅកិច្ចព្រមព្រៀងគ្រាប់ធញ្ញជាតិវិញភ្លាមៗ នៅពេលដែលលក្ខខណ្ឌទាក់ទងនឹងប្រទេសរុស្ស៊ីត្រូវបានបំពេញ។
កាលពីព្រឹកថ្ងៃអង្គារ ឯកអគ្គរដ្ឋទូតសហរដ្ឋអាមេរិក ប្រចាំអង្គការសហប្រជាជាតិ លោកស្រី Linda Thomas-Greenfield បានឲ្យដឹងថា សហរដ្ឋអាមេរិក បានមើលឃើញសញ្ញាដែលបង្ហាញថា ប្រទេសរុស្ស៊ី “ចាប់អារម្មណ៍ក្នុងការត្រលប់ទៅការពិភាក្សា” លើកិច្ចព្រមព្រៀងគ្រាប់ធញ្ញជាតិ។
ដោយធ្វើអត្ថាធិប្បាយថា តើស្ថានការណ៍បានផ្លាស់ប្តូរ និងការត្រៀមខ្លួនរបស់ទីក្រុងមូស្គូ ក្នុងការត្រលប់ទៅការចរចាលើការបន្តកិច្ចព្រមព្រៀងឡើងវិញនោះ លោក Peskov បានបញ្ជាក់ថា លទ្ធភាព គឺស្ថិតនៅក្នុងសន្លឹកបៀ ដរាបណាលក្ខខណ្ឌរបស់រុស្ស៊ី ត្រូវបានបំពេញដោយបណ្ដាមេដឹកនាំពិភពលោក។
លោក Peskov បានលើកឡើងថា “ទីក្រុងម៉ូស្គូ បានត្រៀមខ្លួនជាស្រេច ដើម្បីត្រលប់ទៅកិច្ចព្រមព្រៀងគ្រាប់ធញ្ញជាតិវិញភ្លាមៗ ប៉ុន្តែវានឹងប្រព្រឹត្តទៅបានលុះត្រាតែលក្ខខណ្ឌទាក់ទងនឹងប្រទេសរុស្ស៊ីត្រូវបានបំពេញ” ។
ការអត្ថាធិប្បាយរបស់លោក Peskov កើតឡើងប៉ុន្មានថ្ងៃបន្ទាប់ពីប្រធានាធិបតីរុស្ស៊ី លោក វ្ល៉ាឌីមៀ ពូទីន បានគូសបញ្ជាក់ក្នុងកិច្ចប្រជុំរដ្ឋាភិបាលនាពេលថ្មីៗនេះថា រុស្ស៊ី “បានបង្ហាញនូវអព្ភូតហេតុនៃការស៊ូទ្រាំ និងភាពអត់ធ្មត់ ការអត់ឱន” នៅពេលដែលខ្លួនឈានដល់តម្រូវការនៃកិច្ចព្រមព្រៀងគ្រាប់ធញ្ញជាតិ។
ទោះបីជាយ៉ាងណាក៏ដោយ ដោយសារកិច្ចខិតខំប្រឹងប្រែងរបស់រុស្ស៊ីមិនមានបញ្ហាអ្វីនោះទេ លោកប្រធានាធិបតី បានគូសបញ្ជាក់អំពីឥស្សរជនលោកខាងលិច ជាបន្តបន្ទាប់ “ធ្វើឱ្យខូច និងធ្វើខុស” ក្នុងកិច្ចព្រមព្រៀង ដោយប្រើកិច្ចព្រមព្រៀងនេះ ដើម្បីបង្ខូចនយោបាយ និងប្រជាជាតិ៕ ប្រែសម្រួល ឈូក បូរ៉ា
