វ៉ាស៊ីនតោន៖ សេតវិមានបានឲ្យដឹងថា ប្រធានាធិបតីអាមេរិកលោក ចូ បៃដិន នឹងជួបពិភាក្សាជាមួយប្រធានាធិបតីចិនលោក ស៊ី ជីនពីង នៅថ្ងៃពុធសប្តាហ៍ក្រោយ នៅខាងក្រៅសន្និសីទសេដ្ឋកិច្ចនៅ San Francisco ជាមួយនឹងការផ្តល់អាទិភាពដល់ការបង្កើត “ក្របខ័ណ្ឌ” ដើម្បីគ្រប់គ្រងទំនាក់ទំនងប្រទេសរបស់ពួកគេឱ្យកាន់តែប្រសើរឡើង ត្រូវបានកំណត់លក្ខណៈដោយការកកិត និងការមិនទុកចិត្ត។
ការអង្គុយចុះលើកដំបូងក្នុងរយៈពេលមួយឆ្នាំដែលត្រូវបានប្រកាសជាផ្លូវការកាលពីថ្ងៃសុក្រដោយប្រទេសចិន បានកើតឡើងបន្ទាប់ពីការសម្របសម្រួលជាច្រើនខែរវាងមហាអំណាចទាំងពីររបស់ពិភពលោក។
មន្ត្រីរដ្ឋបាលជាន់ខ្ពស់របស់លោក បៃដិន បានឲ្យដឹងថា អ្វីៗទាំងអស់ពីកោះតៃវ៉ាន់ និងសមុទ្រចិនខាងត្បូង រហូតដល់ពាណិជ្ជកម្ម semiconductor និងសិទ្ធិមនុស្សនឹងស្ថិតនៅក្នុងរបៀបវារៈ។
មន្ត្រីម្នាក់ក្នុងចំណោមមន្ត្រីបានឲ្យដឹងថា “អ្វីដែលយើងកំពុងស្វែងរកភាគច្រើន គឺបង្កើតក្របខ័ណ្ឌសម្រាប់ការគ្រប់គ្រងប្រកបដោយជោគជ័យនូវទំនាក់ទំនងដ៏លំបាក និងស្មុគស្មាញ ខ្ញុំគិតថាអ្នកនឹងឃើញភស្តុតាងនៃរឿងនោះនៅសប្តាហ៍ក្រោយ”។
លោក ស៊ី នឹងធ្វើទស្សនកិច្ចរយៈពេលបួនថ្ងៃទៅកាន់ទីក្រុង San Francisco ចាប់ពីថ្ងៃអង្គារនេះសម្រាប់កិច្ចប្រជុំជាមួយលោក បៃដិន និងដើម្បីចូលរួមកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក នេះបើយោងតាមក្រសួងការបរទេសចិន។
ប្រភពបានឲ្យដឹងថាប្រធានាធិបតីនឹងមាន “ការប្រាស្រ័យទាក់ទងស៊ីជម្រៅ” លើបញ្ហានៃសារៈសំខាន់ “យុទ្ធសាស្ត្រ ទូលំទូលាយ និងជាមូលដ្ឋាន” ក្នុងការបង្កើតទំនាក់ទំនងទ្វេភាគី និងប្រធានបទសំខាន់ៗ ដែលទាក់ទងនឹងសន្តិភាព និងការអភិវឌ្ឍន៍ពិភពលោក។
មន្ត្រីអាមេរិកបានឲ្យដឹងថា គោលដៅចម្បងរបស់រដ្ឋបាលគឺរក្សាស្ថិរភាពទំនាក់ទំនងរបស់ខ្លួនជាមួយប្រទេសចិន ក្នុងវិធីដែលគាំទ្រប្រជាជននៅក្នុងសហរដ្ឋអាមេរិក និងសម្ព័ន្ធមិត្ត និងដៃគូរបស់ខ្លួន ដោយដកចេញនូវផ្នែកមួយចំនួននៃការយល់ច្រឡំ៕ ប្រែសម្រួល ឈូក បូរ៉ា
