ទឹកជំនន់ នៅប្រេស៊ីល បណ្តាលឱ្យមនុស្សស្លាប់រាប់សិបនាក់ និងជាង១០០នាក់ កំពុងបាត់ខ្លួន

បរទេស៖ អាជ្ញាធរក្នុងតំបន់បាននិយាយកាលពីថ្ងៃអាទិត្យថា ទឹកជំនន់ដ៏ធំនៅក្នុងរដ្ឋ Rio Grande do Sul ភាគខាងត្បូងប្រទេសប្រេស៊ីល បានសម្លាប់មនុស្សយ៉ាងហោចណាស់ ៧៥ នាក់ក្នុងរយៈពេល៧ថ្ងៃចុងក្រោយនេះ ហើយមនុស្ស ១០៣ នាក់ផ្សេងទៀតត្រូវបានគេរាយការណ៍ថាបានបាត់ខ្លួន។

យោងតាមសារព័ត៌មាន VOA ចេញផ្សាយនៅថ្ងៃទី៥ ខែឧសភា ឆ្នាំ២០២៤ បានឱ្យដឹងថា យ៉ាងហោចណាស់មនុស្ស ១៥៥ នាក់បានរងរបួស ខណៈដែលការខូចខាតដោយសារភ្លៀង បានបង្ខំមនុស្សជាង ៨៨.០០០ នាក់ចេញពីផ្ទះ ។ ប្រជាជនប្រហែល ១៦.០០០ នាក់បានជ្រកកោននៅក្នុងសាលារៀន កន្លែងហាត់ប្រាណ និងកន្លែងស្នាក់នៅបណ្តោះអាសន្នផ្សេងទៀត។

ទឹកជំនន់បានបន្សល់ទុកនូវការបំផ្លិចបំផ្លាញ រួមទាំងការបាក់ដី ផ្លូវដែលត្រូវទឹកជន់លិច និងស្ពានបាក់នៅទូទាំងរដ្ឋ។ ប្រតិបត្តិករបានរាយការណ៍ពីការកាត់ផ្តាច់ចរន្តអគ្គិសនី និងទំនាក់ទំនង។ ប្រតិបត្តិករបានរាយការណ៍ពីការកាត់ផ្តាច់ចរន្តអគ្គិសនី និងទំនាក់ទំនង។ យោងតាមទីភ្នាក់ងារការពារជនស៊ីវិល ដែលដកស្រង់តួលេខពីក្រុមហ៊ុនទឹក Corsan បានឱ្យដឹងថា មនុស្សជាង ៨០០.០០០ នាក់គ្មានការផ្គត់ផ្គង់ទឹកទេ។

ក្រុមជួយសង្គ្រោះបានទាញបុរសចំណាស់ម្នាក់ដែលមានស្ថានភាពសុខភាពធ្ងន់ធ្ងរចូលទៅក្នុងឧទ្ធម្ភាគចក្រពីតំបន់ដាច់ស្រយាលមួយក្នុងក្រុង Bento Goncalves, នេះបើយោងតាមវីដេអូពីក្រុមពន្លត់អគ្គីភ័យយោធា។ ទឹកពណ៌ត្នោតហូរពេញទំនប់ក្បែរនោះ៕ ប្រែសម្រួលៈ ណៃ តុលា