សេអ៊ូល៖ ទីភ្នាក់ងារទេសចរណ៍ ដែលមានមូលដ្ឋាននៅទីក្រុងប៉េកាំងបានឲ្យដឹងថា ប្រទេសកូរ៉េខាងជើង អាចនឹងបើកទ្វាររបស់ខ្លួនឡើងវិញ សម្រាប់ភ្ញៀវទេសចរអន្តរជាតិនៅក្នុងខែធ្នូ បន្ទាប់ពីបានបិទខ្លួនអស់រយៈពេលជាង ៤ឆ្នាំដោយសារការរាតត្បាតនៃជំងឺកូវីដ-១៩ ។
ទីភ្នាក់ងារទេសចរណ៍ Koryo Tours បានឲ្យដឹងនៅលើគេហទំព័ររបស់ខ្លួនកាលពីថ្ងៃពុធថា ខ្លួនបានទទួលការបញ្ជាក់ពីដៃគូក្នុងស្រុករបស់ខ្លួនថា ទេសចរណ៍ទៅកាន់រមណីយដ្ឋាន Samjiyon ដែលមានទីតាំងនៅជើងភ្នំ Paektu ក្បែរព្រំដែនកូរ៉េខាងជើងជាមួយប្រទេសចិន និងតំបន់សក្តានុពលផ្សេងទៀតនៃប្រទេស នឹងចាប់ផ្តើមឡើងវិញជាផ្លូវការនៅក្នុងខែធ្នូ។
ទីក្រុងព្យុងយ៉ាងបានបិទព្រំដែនរបស់ខ្លួននៅដើមឆ្នាំ២០២០ ដោយសារជំងឺរាតត្បាត ប៉ុន្តែបានទទួលយកក្រុមទេសចរណ៍រុស្ស៊ីមួយចំនួនតូចចាប់តាំងពីដើមឆ្នាំនេះ។ Koryo Tours បានឲ្យដឹងថា ដំណើរកម្សាន្តផ្លូវការ និងកាលបរិច្ឆេទសម្រាប់ដំណើរទេសចរណ៍កូរ៉េខាងជើង នឹងត្រូវបានប្រកាសនៅក្នុងសប្តាហ៍ខាងមុខនេះ។
មុនពេលមានវិបត្តិសុខភាពសាធារណៈ ជនជាតិចិនបានបង្កើនចំនួនភ្ញៀវទេសចរបរទេសទៅទស្សនាកូរ៉េខាងជើងជាច្រើន នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
កាលពីខែកក្កដា មេដឹកនាំកូរ៉េខាងជើង លោក គីម ជុងអ៊ុន បានទៅទស្សនារមណីយដ្ឋាន Samjiyon ហើយបានលើកឡើងថា ប្រទេសនេះនឹងសាងសង់រមណីយដ្ឋានជិះស្គីដ៏ធំមួយនៅក្បែរនោះ។ លោកបានបន្ដថា រមណីយដ្ឋាននេះនឹងធ្វើឱ្យ “សូម្បីតែមិត្តភក្តិបរទេសមានអារម្មណ៍ទាក់ទាញពិសេស”៕
