បំណុលក្នុងគ្រួសារជាមធ្យមនៅក្នុងប្រទេសថៃ ឈានដល់កម្រិតខ្ពស់បំផុតដោយសារតែកំណើនសេដ្ឋកិច្ចយឺត ប្រាក់ចំណូលទាប និងថ្លៃរស់នៅខ្ពស់

បរទេស៖ ការស្ទង់មតិមួយបានបង្ហាញកាលពីថ្ងៃអង្គារថា បំណុលក្នុងគ្រួសារជាមធ្យមនៅក្នុងប្រទេសថៃ បានឈានដល់កម្រិតខ្ពស់បំផុតដោយសារតែកំណើនសេដ្ឋកិច្ចយឺត ប្រាក់ចំណូលទាប និងថ្លៃរស់នៅខ្ពស់ ហើយប្រជាជនកំពុងមានបញ្ហាក្នុងការផ្តល់ប្រាក់កម្ចីរបស់ពួកគេ។

យោងតាមសារព័ត៌មាន បាងកក ប៉ុស្តិ៍ ចេញផ្សាយកាលពីថ្ងៃទី១០ ខែកញ្ញា ឆ្នាំ២០២៤ បានឱ្យដឹងថា បំណុលជាមធ្យមក្នុងមួយគ្រួសារគឺ ៦០៦.៣៧៨ បាត កើនឡើង ៨,៤ភាគរយ ពីឆ្នាំមុន នេះបើយោងតាមការស្ទង់មតិដោយសាកលវិទ្យាល័យសភាពាណិជ្ជកម្មថៃដែលបានធ្វើឡើងនៅដើមខែកញ្ញា។ វាជាតួលេខខ្ពស់បំផុតចាប់តាំងពីការស្ទង់មតិបានចាប់ផ្តើមក្នុងឆ្នាំ ២០០៩ ។

ការស្ទង់មតិបានរកឃើញថា ៦៩,៩ភាគរយ នៃបំណុលគឺមកពីការផ្តល់ប្រាក់កម្ចីជាផ្លូវការធ្លាក់ចុះពី ៨០,២ភាគរយ កាលពីឆ្នាំមុន ខណៈពេលដែល ៣០ភាគរយ មកពីការផ្តល់ប្រាក់កម្ចីក្រៅផ្លូវការ។ សមាមាត្រនៃការផ្តល់ប្រាក់កម្ចីក្រៅផ្លូវការបានកើនឡើងដោយសារតែមនុស្សកាន់តែច្រើនឈានដល់ដែនកំណត់ឥណទានរបស់ពួកគេសម្រាប់ការផ្តល់ប្រាក់កម្ចីជាផ្លូវការដែលបណ្តាលឱ្យពួកគេងាកទៅរកប្រាក់កម្ចីដែលមានការប្រាក់ខ្ពស់។

យោងតាមសាកលវិទ្យាល័យបានឱ្យដឹងថា អតិថិជនជាច្រើនមានប្រាក់ចំណូលមិនគ្រប់គ្រាន់ក្នុងការចំណាយ ភាពអាសន្នផ្នែកហិរញ្ញវត្ថុ និងថ្លៃចំណាយក្នុងការរស់នៅដែលមិនរំពឹងទុក។

ការសងបំណុលប្រចាំខែជាមធ្យម គឺ ១៨,៧៨៧ បាតក្នុងមួយខែ កើនឡើងពី ១៦,៧៤២ បាតកាលពីឆ្នាំមុន ជាមួយនឹងអត្រានៃការសងការប្រាក់យឺតយ៉ាវ ៧១,៦ភាគរយ។ នេះបើតាម ការស្ទង់មតិបានរកឃើញ។

រដ្ឋាភិបាល និងធនាគារកណ្តាលថៃបានសម្តែងការព្រួយបារម្ភចំពោះបំណុលគ្រួសាររបស់ប្រទេសចំនួន ១៦,៤ ពាន់ពាន់លានបាត ឬស្មើនឹង ៩០,៨ភាគរយនៃផលិតផលក្នុងស្រុកសរុប (GDP) នៅចុងខែមីនា ឆ្នាំ ២០២៤ ក្នុងចំណោមប្រទេសខ្ពស់បំផុតនៅអាស៊ី៕

ប្រែសម្រួលៈ ណៃ តុលា