បរទេស ៖ យោងតាមការចេញផ្សាយរបស់ RT បេសកជន របស់ទីក្រុងគៀវ ប្រចាំនៅទីក្រុងអង់ការ៉ា ប្រទេសតួគី បាននិយាយកាល ពីថ្ងៃពុធថា អ៊ុយក្រែននៅតែចាប់អារម្មណ៍ នឹងរៀបចំ កិច្ចប្រជុំកំពូល ដើម្បីសន្តិភាព ដែលនឹងមានការពាក់ព័ន្ធ ជាមួយរុស្ស៊ី នៅចុងឆ្នាំនេះ។
ការិយាល័យរបស់ លោកVladimir Zelensky ប្រធានាធិបតីអ៊ុយក្រែន បាននិយាយ នៅសប្តាហ៍នេះថា ខ្លួនបានលុបចោល សន្និសីទ ដែលបានគ្រោងទុក សម្រាប់ខែវិច្ឆិកា រួចទៅហើយប៉ុន្តែយ៉ាងណាក្តីបើតាមឯកអគ្គរដ្ឋទូត Vasily Bodnar ទោះជាយ៉ាងនេះក្តី ក្រុងគៀវនៅតែចង់មានការចរចាដោយ មិនផ្ទាល់ផ្សេងទៀត ជាមួយនឹងរុស្សី។
លោក Bodnar បាននិយាយនៅ ក្នុងសន្និសីទសារព័ត៌មាន មួយនៅរដ្ឋធានីតួគី កាលពីថ្ងៃពុធថា ៖គោលដៅសំខាន់ បំផុតមួយ នៃកិច្ចប្រជុំកំពូលនេះ គឺដើម្បីឈានដល់សន្តិភាពដោយយុត្តិធម៌ នៅក្នុងអ៊ុយក្រែន ។យើងសង្ឃឹមថានឹងរៀបចំកិច្ចប្រជុំកំពូលនេះនៅចុងឆ្នាំនេះ ។
យោងតាមការបញ្ជាក់បន្ថែមលោក Bodnar បានឲ្យដឹងថាប្រទេសតួគី នឹងក្លាយជាអ្នកចូលរួមដ៏សំខាន់នៅក្នុងសន្និសិទ ដែលបានផ្តល់បទពិសោធន៍ របស់ខ្លួនក្នុង ការសម្របសម្រួលជម្លោះ ។ ទីក្រុងអង់ការ៉ាបានព្យាយាមរក្សាទំនាក់ទំនង ជាមួយទាំងទីក្រុងមូស្គូ និងទីក្រុងគៀវ ក្នុងអំឡុងពេលជម្លោះ ដែលបានផ្ទុះឡើង ក្នុងខែកុម្ភៈ ឆ្នាំ២០២២មកម្ល៉េះ។
គួរឲ្យដឹងដែរថាប្រទេសមួយចំនួន បានផ្តល់ការសម្រុះសម្រួលរវាងរុស្ស៊ី និងអ៊ុយក្រែន ប៉ុន្តែមិនបានជោគជ័យច្រើនទេហើយ ទីក្រុងគៀវបានបន្តទទូចលើរូបមន្ត សន្តិភាពរបស់ Zelensky ដែលជាបញ្ជីប្រាថ្នាដប់ចំណុច ដែលស្មើនឹងការចុះចាញ់ ជាក់ស្តែងរបស់ទីក្រុងមូស្គូ ៕
ប្រែសម្រួល៖ស៊ុនលី
