បរទេស៖ ប៉ូលិសក្នុងតំបន់ បាននិយាយនៅថ្ងៃអាទិត្យថា បុរសម្នាក់ត្រូវបានចាប់ខ្លួន នៅប៉ុស្តិ៍ត្រួតពិនិត្យសន្តិសុខមួយ នៅជិតការជួបជុំរបស់បេក្ខជន ប្រធានាធិបតី គណបក្សសាធារណរដ្ឋ លោក ដូណាល់ ត្រាំ នៅរដ្ឋកាលីហ្វ័រញ៉ា កាលពីថ្ងៃសៅរ៍ ដោយប្រឈមមុខ នឹង ការចោទប្រកាន់ពីបទប្រើប្រាស់ កាំភ្លើង បន្ទាប់ពីគាត់ត្រូវបានគេរក ឃើញថាមានអាវុធ លិខិតឆ្លងដែនជាច្រើន និងផ្លាកលេខក្លែងក្លាយ ។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី១៤ ខែតុលា ឆ្នាំ២០២៤ បានឱ្យដឹងថា លោក Chad Bianco ស្នងការប៉ូលីសតំបន់ Riverside County បាននិយាយថា គាត់ជឿថានាយកដ្ឋានរបស់គាត់បានបញ្ឈប់ការប៉ុនប៉ងធ្វើឃាត ទោះបីជាគាត់ទទួលស្គាល់ថា នោះជា “ការរំពឹងទុក” ក៏ដោយ ។ កំណត់ត្រាក្នុងពន្ធនាគារ បានបង្ហាញថា ជនសង្ស័យត្រូវបានដោះលែង ឱ្យនៅក្រៅឃុំកាលពីថ្ងៃសៅរ៍ ។ មន្ត្រីសហព័ន្ធបាននិយាយកាលពីថ្ងៃអាទិត្យថា ការស៊ើបអង្កេតសហព័ន្ធ កំពុងដំណើរការ ។
ប៉ូលិសបាននិយាយក្នុងសន្និសីទសារព័ត៌មាន កាលពីរសៀលថ្ងៃអាទិត្យថា «អ្វីដែលយើងដឹងគឺគាត់ បានបង្ហាញលិខិតឆ្លង ដែនជាច្រើនដែលមានឈ្មោះខុសៗគ្នា រថយន្តមិនបានចុះបញ្ជីជាមួយស្លាកលេខក្លែងក្លាយ និងអាវុធមានគ្រាប់ជាច្រើន»។ «ខ្ញុំពិតជាជឿថា យើងបានរារាំងការប៉ុនប៉ង ធ្វើឃាតមួយផ្សេងទៀត»។
បើយោងតាមការិយាល័យប៉ូលីស គឺមានបុរសអាយុ ៤៩ឆ្នាំដែលត្រូវបានគេកំណត់អត្តសញ្ញាណថាជាអ្នករស់នៅក្នុងទីក្រុង Las Vegas គឺលោក Vem Miller ត្រូវបានបញ្ឈប់ នៅក្នុងរថយន្ត SUV ពណ៌ខ្មៅដោយអ្នកតំណាង របស់ប៉ូលីស នៅម៉ោងប្រហែល ៥ ល្ងាច ម៉ោងក្នុងស្រុកកាលពីថ្ងៃសៅរ៍ ហើយត្រូវបានចាប់ខ្លួនដោយគ្មាន ឧបទ្ទវហេតុណាមួយកើតឡើង ចំណែកលោក ដូណាល់ ត្រាំ មិនទាន់បានឡើងឆាកនោះទេ ។
កំណត់ត្រាក្នុងពន្ធនាគារបង្ហាញថា Miller ត្រូវបានដោះលែង ឱ្យនៅក្រៅឃុំដោយបង់ ប្រាក់ធានាចំនួន ៥.០០០ ដុល្លារកាលពីថ្ងៃសៅរ៍ បន្ទាប់ពីត្រូវបានចោទប្រកាន់ពីបទ កាន់កាប់អាវុធផ្ទុកលើសកំណត់ ទាំងបទមជ្ឈិម។ លោកមិនអាចទាក់ទងបានភ្លាមៗ ដើម្បីសុំការអត្ថាធិប្បាយ បានទេកាលពីថ្ងៃអាទិត្យ។
ការិយាល័យប៉ូលីសអាមេរិក បាននិយាយនៅ ក្នុងសេចក្តីប្រកាសព័ត៌មានមួយថា “ឧបទ្ទវហេតុនេះមិនប៉ះពាល់ ដល់សុវត្ថិភាពរបស់អតីតប្រធានាធិបតី ដូណាល់ ត្រាំ ឬអ្នកចូលរួមព្រឹត្តិការណ៍នោះទេ” ។
ការិយាល័យមេធាវីអាមេរិក នៅទីក្រុង Los Angeles ក្នុងសេចក្តីថ្លែងការណ៍ មួយនៅលើគេហទំព័ររបស់ខ្លួន កាលពីថ្ងៃអាទិត្យ ក៏បាននិយាយផងដែរ ថាលោក ត្រាំ មិនស្ថិតក្នុងគ្រោះថ្នាក់ទេ ដោយដកស្រង់ពីសេវាកម្ម សម្ងាត់របស់សហរដ្ឋអាមេរិក ។ សេចក្តីថ្លែងការណ៍បានបន្ថែមថា ខណៈដែលគ្មានការ ចាប់ខ្លួនសហព័ន្ធត្រូវបានធ្វើឡើង ការស៊ើបអង្កេតកំពុងបន្ត។
សូមរំលឹកថា លោក ដូណាល់ ត្រាំ បានរួចផុតពីការប៉ុនប៉ង ធ្វើឃាតកាលពីខែកក្កដា នៅពេលដែលគ្រាប់កាំភ្លើង របស់ខ្មាន់កាំភ្លើងបានចំត្រចៀក របស់លោកក្នុងអំឡុងពេលការប្រមូលផ្តុំយុទ្ធនាការ មួយនៅទីក្រុង Butler រដ្ឋ Pennsylvania ហើយកាលពីខែកញ្ញា ក៏មានបុរសម្នាក់ទៀត ត្រូវបានចោទប្រកាន់ពីបទព្យាយាម ធ្វើឃាតលោកថែមទៀត បន្ទាប់ពីភ្នាក់ងារសម្ងាត់បានរកឃើញថា ខ្មាន់កាំភ្លើង បានលាក់ខ្លួនជាមួយនឹងកាំភ្លើងវែង នៅជិតទីលានវាយកូនហ្គោល Palm Beach របស់លោក ដូណាល់ ត្រាំ ៕
