បរទេស ៖ យោងតាមការចេញផ្សាយ របស់ RT សមាជិកព្រឹទ្ធសភាអាមេរិកលោក Lindsey Graham ដែលជាសម្ព័ន្ធមិត្ត ដ៏ជិតស្និទ្ធជាមួយ នឹងប្រធានាធិបតីថ្មី លោក Donald Trump បាននិយាយថា អ៊ុយក្រែនអាចមានប្រយោជន៍ ខ្លាំងណាស់សម្រាប់សហរដ្ឋអាមេរិក ព្រោះវាសំបូរទៅដោយធនធាន ធម្មជាតិដ៏មានតម្លៃ ហើយមានឆន្ទៈ ក្នុងការចរចាកិច្ចព្រមព្រៀង ជាមួយទីក្រុងវ៉ាស៊ីនតោន ស្តីពីការទាញយករ៉ែទាំងនោះទៀតផង។
សមាជិកព្រឹទ្ធសភាមកពីគណបក្ស សាធារណរដ្ឋមកពីរដ្ឋ South Carolina បានប្រាប់ Fox News ថាជម្លោះអ៊ុយក្រែននៅទីបំផុត គឺត្រូវនិយាយគ្នាអំពីលុយប៉ុណ្ណោះ ដោផយការដកស្រង់ នៃបទសម្ភាសន៍ ត្រូវបានផ្សព្វផ្សាយ នៅលើប៉ុស្តិ៍ YouTube របស់សមាជិកព្រឹទ្ធសភាកាលពីថ្ងៃពុធ។
លោកបានបន្តបែបនេះថា ៖ តើអ្នកដឹងទេថាប្រទេស ដែលមានជាងគេបំផុត នៅអឺរ៉ុបទាំងអស់សម្រាប់រ៉ែ កម្រគឺអ៊ុយក្រែន?ហើយការប៉ាន់ស្មានតម្លៃប្រហែលជាពី ២ ទៅ ៧ ទ្រីលានដុល្លារ។
លោក Graham បានបន្ថែមថា អ៊ុយក្រែនត្រៀមខ្លួនជាស្រេចដើម្បី ធ្វើកិច្ចព្រមព្រៀងជាមួយយើង ប៉ុន្តែមិនមែនរុស្ស៊ីទេ។
លោកបានមានប្រសាសន៍ដោយពណ៌នាអ៊ុយក្រែនថាជា ធុងបាយរបស់ពិភពលោកហើយ ថា៖ដូច្នេះវាជាចំណាប់អារម្មណ៍របស់យើងក្នុងការធ្វើឲ្យប្រាកដថា រុស្ស៊ី មិនអាចទទួលយកបាន ទីតាំងនោះជាដាច់ខាត៕
ប្រែសម្រួល៖ស៊ុនលី
