បរទេស៖ ប្រធានាធិបតីជាប់ឆ្នោត អាមេរិក Donald Trump បានអំពាវនាវឱ្យរដ្ឋាភិបាលបាញ់ ទម្លាក់យន្តហោះ គ្មានមនុស្សបើកដ៏អាថ៌កំបាំង ដែលលេចឡើងនៅលើអាកាសលើរដ្ឋ New Jersey និងទូទាំងសហរដ្ឋអាមេរិក។
យោងតាមសារព័ត៌មាន VN EXPRESS ចេញផ្សាយនៅថ្ងៃទី១៤ ខែធ្នូ ឆ្នាំ២០២៤ បានឱ្យដឹងថា ប្រធានាធិបតី សហរដ្ឋអាមេរិក- លោក Donald Trump ដែលជាប់ឆ្នោតបានបង្ហោះនៅលើបណ្តាញសង្គម Truth Social កាលពីថ្ងៃទី១៣ ខែធ្នូថា “មានការប្រទះឃើញយន្តហោះគ្មានមនុស្សបើកដ៏អាថ៌កំបាំងជាច្រើននៅទូទាំងប្រទេស។ តើរដ្ឋាភិបាលពិតជាមិនដឹងអំពីរឿងនេះទេ? ខ្ញុំមិនគិតដូច្នេះទេ! ពន្យល់ដល់ប្រជាជនឥឡូវនេះ។ បើមិនដូច្នេះទេ បាញ់ទម្លាក់យន្តហោះគ្មានមនុស្សបើកឥឡូវនេះ!”។
ក្នុងប៉ុន្មានសប្តាហ៍ថ្មីៗនេះ មានរបាយការណ៍កើនឡើងនៃការឃើញយន្តហោះគ្មានមនុស្សបើកដ៏អាថ៌កំបាំងនៅរដ្ឋ New Jersey និង New York។ គេក៏បានឃើញវត្ថុនៅលើអាកាសនៅ Delaware និង Philadelphia។
មន្ទីរបញ្ចកោណកាលពីថ្ងៃទី១២ ខែធ្នូ បានបដិសេធថា យន្តហោះគ្មានមនុស្សបើកអាថ៌កំបាំងនោះ ជាកម្មសិទ្ធិរបស់សត្រូវ ឬអង្គភាពបរទេស នោះទេ។ ខាង សេតវិមាន, FBI និងក្រសួងសន្តិសុខមាតុភូមិ ក៏បានចេញសេចក្តីថ្លែងការណ៍ រួមនៅថ្ងៃជាមួយគ្នាដោយនិយាយថា មិនមានភស្តុតាងណាមួយដែលថា យន្តហោះគ្មានមនុស្សបើក បង្កការគំរាមកំហែង ដល់សន្តិសុខជាតិនោះទេ ដោយនិយាយថា ក្នុងករណីភាគច្រើនយន្តហោះគ្មានមនុស្ស បើកដំណើរការដោយស្របច្បាប់។
សមាជិកសភាមកពីរដ្ឋ New Jersey និងញូវយ៉ក ដែលជាកន្លែងដែលគេ ឃើញយន្តហោះ គ្មានមនុស្សបើកដ៏អាថ៌ កំបាំងបំផុតនោះ បានផ្ញើលិខិតកាលពីថ្ងៃទី ១៣ ខែធ្នូ ទៅកាន់ FBI, ក្រសួងសន្តិសុខមាតុភូមិ និងរដ្ឋបាល អាកាសចរណ៍សហព័ន្ធ ដើម្បីស្នើសុំការសង្ខេបខ្លីៗ អំពីយន្តហោះគ្មានមនុស្សបើក។ ប្រធានសភាលោក Mike Johnson បានទទួលព័ត៌មាន ចាត់ថ្នាក់លើការ មើលឃើញយន្តហោះគ្មាន មនុស្សបើកកាលពីថ្ងៃទី១៣ ខែធ្នូ ប៉ុន្តែមិនទាន់បាន ចេញផ្សាយ វានៅឡើយទេ៕
ប្រែសម្រួលៈ ណៃ តុលា
