បរទេស៖ ទឹកជំនន់កើតឡើងយ៉ាងលឿនបានកើនឡើងនៅថ្ងៃចន្ទ នៅភាគឦសានប្រទេសអូស្ត្រាលី បន្ទាប់ពីបានបង្ខំមនុស្សជាច្រើនឱ្យភៀសខ្លួន ធ្វើឱ្យផ្ទះសម្បែងគ្មានអគ្គិសនីប្រើប្រាស់ ។
យោងតាមសារព័ត៌មាន VOA ចេញផ្សាយនៅថ្ងៃទី២ ខែកុម្ភៈ ឆ្នាំ២០២៥ បានឱ្យដឹងដោយផ្អែកតាមអាជ្ញាធរថា ខ្យល់ព្យុះបានបង្កឱ្យមានភ្លៀងធ្លាក់ខ្លាំង ទឹកឡើងជាងមួយម៉ែត្រក្នុងរយៈពេលពីរថ្ងៃនៅក្នុងផ្នែកខ្លះនៃរដ្ឋ Queensland ដោយបានលេបត្របាក់ផ្ទះ អាជីវកម្ម និងផ្លូវថ្នល់ក្នុងទឹកភក់។
រូបភាពពីលើអាកាសបានបង្ហាញពីសហគមន៍ជនបទដែលហ៊ុំព័ទ្ធដោយទឹកជំនន់ ដែលកាត់ផ្តាច់ចេញពីផ្លូវនៅក្បែរនោះ។
នាយករដ្ឋមន្ត្រីនៃរដ្ឋលោក David Crisafulli បានព្រមាននៅក្នុងសន្និសីទសារព័ត៌មានមួយថា “យើងនឹងឃើញភ្លៀងធ្លាក់ និងព្យុះដែលរីករាលដាលពាសពេញភាគខាងជើងនៃរដ្ឋ Queensland”។
លោកបានបន្តថា «យើងនៅតែត្រៀមខ្លួនសម្រាប់ការរំពឹងថានឹងមានភ្លៀងធ្លាក់បន្ថែមទៀត និងលទ្ធភាពនៃការជន់លិចបន្ថែមទៀត ទាំងការជន់លិចភ្លាមៗ និងការជន់លិចតាមដងទន្លេ»។
នាយករដ្ឋមន្ត្រីបាននិយាយទៀតថា សេវាសង្គ្រោះបន្ទាន់បានអនុវត្ត “ការសង្គ្រោះទឹកយ៉ាងលឿន” ចំនួន ១១ ទាំងយប់។លោកបាននិយាយថា តំបន់នៃទីក្រុង Townsville ដែលរងគ្រោះដោយទឹកជំនន់ ដែលជាគោលដៅទេសចរណ៍ឆ្នេរដ៏ពេញនិយមដែលស្ថិតនៅជិតតំបន់ Great Barrier Reef ត្រូវបានប្រកាសថាជា “តំបន់ខ្មៅ” ៕
ប្រែសម្រួលៈ ណៃ តុលា
