បរទេស៖ ប្រធានាធិបតីអាមេរិកលោក ដូណាល់ ត្រាំ និងមេដឹកនាំចិន លោក ស៊ី ជិនពីង ត្រូវបានកំណត់ក្នុងពេលឆាប់ៗនេះដើម្បីជួបសន្ទនាតាមទូរស័ព្ទទាក់ទងនឹងការសងសឹកទៅលើការតម្លើងពន្ធនាំចូលរៀងៗខ្លួន។
យោងតាមសារព័ត៌មាន VOA ចេញផ្សាយនៅថ្ងៃទី៤ ខែកុម្ភៈ ឆ្នាំ២០២៥ បានឱ្យដឹងថា ពន្ធ ១០ភាគរយថ្មីរបស់លោក ដូណាល់ ត្រាំ លើទំនិញរបស់ចិនបានចូលជាធរមាននៅពាក់កណ្តាលអធ្រាត្រថ្ងៃច័ន្ទ ដោយប្រទេសចិនបានប្រកាសយ៉ាងឆាប់រហ័សវិញថា ខ្លួននឹងដំឡើងពន្ធ ១៥ភាគរយលើធ្យូងថ្ម និងឧស្ម័នធម្មជាតិរាវរបស់សហរដ្ឋអាមេរិក ក៏ដូចជាពន្ធ ១០ភាគរយ លើប្រេងឆៅ គ្រឿងចក្រកសិកម្ម និងរថយន្តមួយចំនួនរបស់អាមេរិក។
លោក ត្រាំ កាលពីថ្ងៃចន្ទបានដកថយក្នុងរយៈពេលមួយខែពីការដាក់ពន្ធ ២៥ភាគរយលើការនាំចេញភាគច្រើនពីដៃគូពាណិជ្ជកម្មកំពូលទាំងបីរបស់សហរដ្ឋអាមេរិកគឺម៉ិកស៊ិក និងកាណាដា។ ប្រធានាធិបតីម៉ិកស៊ិក លោកស្រី Claudia Sheinbaum និងនាយករដ្ឋមន្ត្រីកាណាដា លោក Justin Trudeau បានយល់ព្រមបង្កើនកិច្ចខិតខំប្រឹងប្រែងដើម្បីទប់ស្កាត់លំហូរនៃសារធាតុធាតុ fentanyl ដែលជាថ្នាំអាភៀនដ៏សាហាវដែលបានសម្លាប់ជនជាតិអាមេរិកជាច្រើនរយពាន់នាក់ក្នុងរយៈពេលប៉ុន្មានឆ្នាំថ្មីៗនេះ។
លោក ដូណាល់ ត្រាំ បាននិយាយថា លោកបានដាក់ពន្ធលើការនាំចេញរបស់ចិន ដើម្បីដាក់សម្ពាធលើប្រទេសចិនឱ្យចាត់វិធានការទប់ស្កាត់ការរត់ពន្ធថ្នាំញៀនប្រភេទ fentanyl ចូលទៅក្នុងសហរដ្ឋអាមេរិក ដែលកំណត់ថាប្រទេសចិនជាប្រភពសំខាន់នៃសារធាតុគីមីមុនគេដែលប្រើប្រាស់ដោយក្រុមជួញដូរគ្រឿងញៀនម៉ិកស៊ិកដើម្បីផលិត fentanyl ។
អ្នកនាំពាក្យសេតវិមានលោកស្រី Karoline Leavitt បាននិយាយថា ការហៅទូរស័ព្ទរបស់លោក ដូណាល់ ត្រាំ ជាមួយលោក ស៊ី ជិនពីង “ត្រូវបានគ្រោងទុក ហើយនឹងកើតឡើងក្នុងពេលឆាប់ៗនេះ”៕
ប្រែសម្រួលៈ ណៃ តុលា
