ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងប្រកាសថា មិនមានគោលការណ៍ផ្លាស់ប្តូររដ្ឋមន្រ្តីថ្មីទៀតឡើយ ដូច្នេះបញ្ចប់ពាក្យចចាមអារ៉ាមថា «ផ្លាស់ប្ដូររដ្ឋមន្ដ្រី»។
នាឱកាសអញ្ជើញជាអធិបតីបិទសន្និបាតបូកសរុបលទ្ធផលការងារ ៥ឆ្នាំ២០២០-២០២៤ នៃដំណើរឆ្ពោះទៅបរិវត្តកម្មឌីជីថល និងទិសដៅការងារបន្ត របស់ក្រសួងប្រៃសណីយ៍ និងទូរគមនាគមន៍ នៅថ្ងៃទី៦ ខែគុម្ភៈ ឆ្នាំ២០២៥ សម្តេចមហាបវរធិបតី ហ៊ុន ម៉ាណែត បានឱ្យដឹងថា រឿងដូររដ្ឋមន្រ្តីនេះ បានលេចលឺតាំងពីចុងឆ្នាំ២០២៤ម្ល៉េះ ថា «បន្តិចទៀត នឹងមានការដូរដ្ឋមន្រ្តី៥-៦ ក្រសួង ហើយមន្រ្តី មិនបាច់ធ្វើការទេ ចាំមេថ្មីមកទៅ»។
សម្តេចបវរធិបតី មានប្រសាសន៍ថា «ឥឡូវខ្ញុំសូមប្រកាសតាមនេះតែម្តងទៅ អញ្ចេះខ្ញុំសូមប្រាប់ ព្រោះដូររដ្ឋមន្រ្តីអី បើនាយករដ្ឋមន្រ្តីអត់ដឹងផង យូរៗប្រពន្ធខ្ញុំមកថាខ្ញុំលាក់គាត់ទៀត ព្រោះគេប្រាប់គាត់ៗថាច្បាស់»។ ខ្ញុំសូមអញ្ចេះទី១ណា រឿងការស្នើសុំតែងតាំងផ្លាស់ប្តូររដ្ឋមន្រ្តី ឬមួយសមាជិករាជរដ្ឋាភិបាល គឺជាសិទ្ធិ និងការទទួលខុសត្រូវរបស់ នាយករដ្ឋមន្រ្តី ហើយបើនាយករដ្ឋមន្រ្តីអត់ដឹងផង កុំព្រួយបារម្ភ ហើយបើខ្ញុំអត់ដឹងផង គឺមិនមានក្រសួងណាត្រូវដោះដូរទៀតទេនៅពេលនេះ អីចឹងសូមឱ្យរលត់ទៅរឿងនេះ។
សម្តេចបវរធិបតី ហ៊ុន ម៉ាណែត ក៏បានអំពាវនាវដល់មន្រ្តីបណ្តាក្រសួងទាំងអស់ធ្វើការ ហើយកុំខ្វល់អំពីការផ្លាស់ប្តូររដ្ឋមន្រ្តីខ្លាំងពេក ត្រូវប្រឹងប្រែងធ្វើការងារវិញ៕
