បរទេស ៖ ក្រសួងសុខាភិបាល សាធារណៈ របស់ប្រទេសថៃ នឹងបើកមជ្ឈមណ្ឌលបញ្ជាមួយ ដើម្បីសម្របសម្រួល ជាមួយមន្ទីរពេទ្យព្រំដែន ជុំវិញការព្យាបាលអ្នកជំងឺជនភៀសខ្លួន បន្ទាប់ពីការព្យួរថវិកា របស់គណៈកម្មាធិការ សង្គ្រោះអន្តរជាតិ (IRC)។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី១០ ខែកុម្ភៈ ឆ្នាំ២០២៥ បានឱ្យដឹងថា រដ្ឋមន្ត្រីសុខាភិបាលថៃ លោក Somsak Thepsutin បាននិយាយថា ខ្លួនក៏មានគម្រោងបញ្ជូនក្រុមគ្រូពេទ្យ ចល័តទៅផ្តល់ការព្យាបាល នៅក្នុងជម្រកជនភៀសខ្លួនរៀងរាល់សប្តាហ៍ក្នុងអំឡុងពេលនោះដែរ។
នេះធ្វើតាមការសម្រេចចិត្តនាពេលថ្មីៗនេះ របស់ប្រធានាធិបតីអាមេរិក Donald Trump ក្នុងការផ្អាកការផ្តល់មូលនិធិសម្រាប់ IRC រយៈពេលបីខែ។ សម្រាប់ប្រទេសថៃ លោក Somsak បាននិយាយថា រួមមានជំរកជនភៀសខ្លួន ចំនួនប្រាំបួនដែលត្រូវបានបង្កើតឡើងក្នុងឆ្នាំ ១៩៨៤ ហើយឥឡូវនេះ ជាជម្រកសម្រាប់ជនភៀសខ្លួន យ៉ាងហោចណាស់ ១០ម៉ឺននាក់ ។
ប្រាំពីរក្នុងចំណោមនោះ ដែលមានទីតាំងនៅ Ratchaburi, Kanchanaburi, Tak និង Mae Hong Son ត្រូវបានដំណើរការក្រោមការឃ្លាំមើលរបស់ IRC ។ ពួកគេបម្រើជនភៀសខ្លួនចំនួន ៦៩.៧៨៩ នាក់ នៅពេលនេះ ដោយមានថវិកាគាំទ្រ ដោយទីភ្នាក់ងារសន្តិសុខ ក្នុងកិច្ចសហប្រតិបត្តិការជាមួយអង្គការសហប្រជាជាតិ (UN) និងអង្គការអន្តរជាតិ។
ក្រសួងបានរាយការណ៍ថា នៅឆ្នាំ ២០២៤ ទីជម្រកទាំងប្រាំពីរបានផ្ទេរអ្នកជំងឺ ១៣.៨៣៥ នាក់ ទៅមន្ទីរពេទ្យសាធារណៈរបស់ប្រទេសថៃ ក៏ដូចជាការផ្តល់ថ្នាំបង្ការ ដល់កុមារចំនួន ២៦.២៥៥ នាក់ដែលមានអាយុពី ១ ដល់ ៥ ឆ្នាំ។ ក្រសួងបានរួមចំណែកប្រហែល ៨០,៨ លានបាតដល់ថវិកា ព្យាបាលជនភៀសខ្លួនកាលពីឆ្នាំមុន ឬប្រហែល ៦,៧៤លានបាតក្នុងមួយខែ។
លោក Somsak បាននិយាយថា ការផ្អាកថវិកាសម្រាប់ IRC អាចនាំឱ្យមានការកើនឡើងនូវបន្ទុកការងារសម្រាប់មន្ទីរពេទ្យដែលមានទីតាំងនៅជិតព្រំដែន៕
ប្រែសម្រួលៈ ណៃ តុលា
