ភ្នំពេញ ៖ សាលាដំបួងរាជធានីភ្នំពេញបានបង្គាប់ឲ្យលោករ៉ុង ឈុន និងមនុស្ស២នាក់ទៀត រួមគ្នាសងសំណង ការខូចខាតចំនួន៤០០លានរៀល ទៅឲ្យគណៈកម្មាធិការចម្រុះ កិច្ចការព្រំដែន ។ នេះបើតាមលិខិតជូនដំណឹង របស់ចៅក្រមសាលាដំបូងរាជធានីភ្នំពេញ យី សុខវួច នាថ្ងៃ១១ កុម្ភៈ ។
មនុស្ស២នាក់ទៀត ដែលជាគូកនរបស់លោក រ៉ុង ឈុន ត្រូវរួមគ្នាសងសំណងនោះរួមមាន ៖ ឈ្មោះ ស កណិការ និងឈ្មោះ តុន និមល ។ ដូចនេះ បុគ្គលទាំង៣នាក់នេះ ត្រូវយកប្រាក់មកបង់ឲ្យម្ចាស់បំណុល នៃការអនុវត្ត នៅសាលាដំបូងរាជធានីភ្នំពេញ ក្នុងរយៈ ពេល១ខែ គិតចាប់ពីថ្ងៃទទួល លិខិតជូនដំណឹងនេះ ។
ក្នុងករណីសហកូនបំណុល នៃការអនុវត្ត បានទទួលលិខិតជូនដំណឹងនេះហើយ មិនអនុវត្តតាមការជូនដំណឹងខាងលើ តុលាការនឹងបន្តអនុវត្ត តាមនីតិវិធីតាមច្បាប់ ។
សូមបញ្ជាក់ថា កាលពីថ្ងៃទី១៨ ខែសីហា ឆ្នាំ២០២១ សាលាដំបូងរាជធានីភ្នំពេញ បានប្រកាសស្រាលក្រមសម្រេចឲ្យលោក រ៉ុង ឈុន ជាប់ពន្ធធនាគាររយៈ ២ ឆ្នាំ ចំណែកកញ្ញា សរ កណិកា និងលោក តុន និមល ត្រូវជាប់ពន្ធធនាគារ រយៈពេល២០ ខែ ក្រោមបទចោទ «ញុះញង់ឲ្យមានភាពវឹកវរ ដល់សន្តិសុខសង្គម» ក្រោយពីលោកបានចុះទៅខេត្តត្បូងឃ្មុំដែលមានព្រំដែន ជាប់ប្រទេសវៀតណាម កាលពីអំឡុងខែកក្កដា ឆ្នាំ២០២០ ហើយបានចេញសេចក្តីថ្លែងការណ៍ទៅកាន់សាធារណជនថា ការបោះបង្គោលព្រំដែនថ្មី រវាងកម្ពុជា-វៀតណាម បានចូលដីកម្ពុជា ប្រហែល៥០០ម៉ែត្រ ។ បន្ទាប់ពីលោកលើកឡើងបែបនេះហើយ ត្រូវបានសមត្ថកិច្ចចាប់ខ្លួន កាលពីថ្ងៃទី៣១ ខែកក្កដា ឆ្នាំ២០២០ ៕
