CMAC ប្ដេជ្ញាដោះស្រាយគ្រប់លទ្ធភាព ដើម្បីរក្សាកម្លាំងជំនាញទាំងអស់ ឲ្យនៅបន្ដបំពេញភារកិច្ចជាធម្មតា ទោះបីអាមេរិកផ្អាកជំនួយ

ភ្នំពេញ៖ អង្គភាព CMAC បានបង្ហាញក្ដីប្ដេជ្ញាដោះស្រាយគ្រប់លទ្ធភាព ដើម្បីរក្សាកម្លាំងជំនាញទាំងអស់ ទោះបីអាមេរិកផ្អាកជំនួយ ក្នុងសកម្មភាពដោះមីននៅកម្ពុជា។

បើតាមសេចក្ដីប្រកាសព័ត៌មាន បានឱ្យដឹងថា អង្គភាព CMAC នៅថ្ងៃទី១៣ ខែកុម្ភៈ ឆ្នាំ២០២៥នេះ បានទទួលព័ត៌មានជាផ្លូវការពីអង្គការដៃគូ ដោយស្នើសុំអង្គភាពCMAC ធ្វើការរំសាយបុគ្គលិកនិងកម្លាំងប្រតិបត្តិការ ដែលស្ថិតនៅក្នុងគម្រោងជំនួយ របស់សហរដ្ឋអាមេរិកចាប់ពីថ្ងៃទី១ ខែមីនា ឆ្នាំ២០២៥។

លិខិតបញ្ជាក់ថា «ក្នុងស្ថានភាពចំពោះមុខនេះ អង្គភាពCMAC នឹងខិតខំដោះស្រាយគ្រប់លទ្ធភាពនិងមធ្យោបាយ ដើម្បីរក្សាកម្លាំងជំនាញទាំងអស់ដែលត្រូវកាត់រំសាយនេះ ឲ្យនៅបន្ដបំពេញភារកិច្ច ក្នុងអង្គភាពជាធម្មតា»។

សូមបញ្ជាក់ថា គម្រោងជំនួយថ្មីៗ ដែលអង្គភាពCMAC ទើបទទួលបានពីដៃគូអភិវឌ្ឍន៍ និងប្រទេសផ្ដល់ជំនួយជាគម្រោងជំនួយ បន្ដអនុវត្តន៍ជាមួយកម្លាំងជំនាញ ដែលមានស្រាប់ និងមិនមែនជាជំនួយ ដែលត្រូវយកមកជំនួសកម្លាំងជំនាញ ដែលស្ថិតនៅក្រោមគម្រោងគាំទ្រថវិកា ដោយរដ្ឋាភិបាលសហរដ្ឋអាមេរិកនោះទេ។​

ក្នុងពេលជាមួយគ្នានេះ​ កម្លាំងប្រតិបត្តិការរបស់អង្គភាពCMAC មានចំនួនប្រមាណ៩២% បន្ដដំណើរការប្រតិបត្តិការជាធម្មតា ដែលកម្លាំងទាំងនេះគាំទ្រដោយរាជរដ្ឋាភិបាលកម្ពុជា និងប្រទេសផ្ដល់ជំនួយមានដូចជា ជប៉ុន ចិន អាឡឺម៉ង់ CMAA/UNDP (គាំទ្រដោយរដ្ឋាភិបាលកូរ៉េខាងត្បូង អូស្ដ្រាលី កាណាដា និងណូវែលហ្សឺឡង់) អង្គការJMAS អង្គការNPA អង្គការAPOPO និងអង្គការMAG៕